Պատգամավորին վայել արձագանքներ արեք․ Աննա Գրիգորյանը բարկացավ. ՏԵՍԱՆՅՈՒԹ

«Իհարկե, այս ամբիոնից կարելի է ասել, որ՝ սյունեցին այսպիսին պետք է լինի և այնպիսին չպետք է լինի։ Ի՞նչ է, դո՞ւք եք որոշում՝ ինչպիսին պետք է լինի սյունեցին։ Ես նորից եմ ասում՝ որակումներ մի տվեց, իրավական գործընթացով պե՞տք է անցնեն մարդիկ, թող անցնեն։ Դո՞ւք եք որոշում՝ ով է խուլիգան, ով ոչ»,- այս մասին ԱԺ արտահերթ նիստում ասաց պատգամավոր Աննա Գրիգորյանը։

«Այս երեք տարիների ընթացքում մենք սևի և սպիտակի բաժանեցինք մեր հասարակությունը։ Հիմա էլ դա ներմուծում ենք նաև Սյունիքի մարզ՝ ասելով, որ կան և լավ սյունեցիներ, ովքեր մեր կողքին են, և կան վատ սյունեցիներ, որոնց էմոցիոնալ, տարբեր հակաէսթետիկ բառապաշարով ենք սկսում նկարագրել։ Այդպես խոսողներին ես պարզապես կխնդրեի, կառաջարկեի գնալ Սյունիք, կանգնել Շուռնուխում և այդ ամենն ասել»,- նշեց պատգամավորը:

«Հայաստանում թիվ մեկ խնդիրը պետք է համախմբումը լինի, ոչ թե հերթական անգամ բաժանարար գծեր անցկացնելը»,- ընդգծեց Գրիգորյանը։

Նա հորդորեց պատգամավորին վայել արձագանքներ անել և իր խոսքը չընդհատել:

«Ասել եք՝ «բա պետք ա բերման ենթարկվեն, այ տենց ստորացնելով բերման ենթարկեն»։ Ես ուզում եմ հիշեցնել, որ ԱԺ պատգամավորը պարտավոր է պահպանել պատգամավորական էթիկայի կանոնները։ Դուք խախտել եք նաև Սահմանադրության մի շարք հոդվածներ, և ես խնդրել եմ բոլոր խմբակցություններին, որպեսզի ստեղծվի էթիկայի հանձնաժողով և քննվի այս հարցը»,- հավելեց Աննա Գրիգորյանը՝ դիմելով «Իմ քայլը» խմբակցության պատգամավոր Հրաչյա Հակոբյանին:

Մանրամասները՝ տեսանյութում: