11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Ռեյտինգայինի հարցով ՀՅԴ-ն կխոսի Սերժ Սարգսյանի հետ
Քաղաքականություն
13.02.2018 | 18:46
«Ռեյտինգային ընտրակարգից հրաժարվելով Հանրապետականը կստորագրի իր մահապատիժը»,- ասում է ՀՀ ԱԺ «Ծառուկյան» խմբակցության անդամ Նաիրա Զոհրաբյանը․ «Ուստի ես հասկանում եմ էն մաքառումը կյանքի գնով, որով իրենք կառչել են ռեյտինգային ընտրակարգը պահպանելուն»։
Չնայած դրան, «Ծառուկյան» խմբակցությունն ուզում է Ընտրական օրենսգրքից հանել ռեյտինգային ընտրակարգը։ Դաշնակցական Արմեն Ռուստամյանը խմբակցության նախաձեռնությունը համարում է անիմաստ գործ՝ Հանրապետականը դեմ կքվեարկի, թեման կփակի։
«Եթե Դաշնակցությունը սպասում է, որ իրենք կկարողանան համոզել Հանրապետական կուսակցությանը, որպեսզի Հանրապետական կուսակցությունը կամավոր գնա ինքնաոչնչացման, ես կարծում եմ, Դաշնակցություն կուսակցությունը պետք է սպասի ևս 125 տարի»,- նկատում է տիկին Զոհրաբյանը։
«Այդքան սպասելու կարիք չկա»,- շոյված հակադարձում է դաշնակցական Արմեն Ռուստամյանը․ «Շատ ուրախ ենք, որ իրենք գիտեն, որ Դաշնակցությունը համառորեն կարող է 125 տարի իր ծրագրերից և նպատակներից չհրաժարվել»։
Պարոն Ռուստամյանը վստահեցնում է, որ ռեյտինգային ընտրակարգը փոխելու իրենց մարտավարությունն ավելի լավն է, իրենք բանակցելու են ու փոխեն, ոչ թե օրենսդրական նախաձեռնության տեսքով մտնեն խորհրդարան ու Հանրապետականի քվեով մերժվեն։ Ավելին, այս թեմայով Դաշնակցությունը կխոսի նաև Սերժ Սարգսյանի հետ։
Մհեր Արշակյան
