Ինչի՞ է վերածվելու Սարյանի պուրակը. հարցը հասավ նախագահի վերահսկողական ծառայություն. ՀԺ

«Հայկական ժամանակ» թերթը գրում է.

«Երևանի Սարյանի պուրակի խնդիրը հասել է նախագահի վերահսկողական ծառայություն: Տարածքը տարիներ շարունակ վարձակալած «Կոլորիտ» ՍՊԸ-ի տնօրեն Նարինե Վարդանյանը,  որը տարիներ շարունակ պուրակում կազմակերպել է նկարների բացօթյա ցուցադրությունը և վաճառքը, «Հայկական ժամանակ»-ին հայտնել է, որ ինքն է դիմել նախագահի վերահսկողական ծառայությանը:

«Կոլորիտ» ՍՊԸ-ի տնօրենը խնդրի վերաբերյալ բացի նախագահականից դիմել է նաև Տարոն Մարգարյանին, վարչապետ Կարեն Կարապետյանին, ԱԺ պատգամավոր Վահե Էնֆիաջյանին, մարդու իրավունքների պաշտպան Արման Թաթոյանին:

Սույն պուրակը, հիշեցնենք, ըստ շրջանառվող լուրերի, անցել է Հայաստանի Ֆուտբոլի ֆեդերացիայի նախագահ Ռուբեն Հայրապետյանի տիրապետության տակ: Վերջինս, սակայն, ՀԺ-ին պարզաբանել էր, թե կապ չունի դրա հետ:

«Կոլորիտ»-ի տնօրենը հայտարարում է՝ չկա այնպիսի մի բան, որ բարձրաձայնվի, և դա իրականություն չլինի: Ինձ թվում է, որ դա իսկապես իրականություն է, որովհետև երբ 2015 թվականից այս քաշքշուկը սկսվեց, ես լրատվամիջոցներից ինֆորմացիա եմ ստացել, որ կողքի շենքի առաջին հարկը գրավադրված է եղել բանկում և հետագայում սեփականատերը դարձել է նրա մորաքրոջ որդին: Կողքից բոլոր խոսակցություններն էլ դա է: Նույնիսկ բակի բնակիչներն են ասում, որ ասել են՝ սպասեք, սրճարանի սեփականատերը դառնան, հետո նոր կտեսնեք, թե այգում ինչ ենք անելու: Ու տալիս են համապատասխան մարդկանց անունները»:

Առավել մանրամասն՝ թերթի այսօրվա համարում:

Հիշեցնենք, որ հունվարի 24-ին Factor.am-ը անդրադարձել էր թեմային իր՝ «Նկարիչները կարող են զրկվե՞լ Սարյանի պուրակի տարածքից․ քաղաքապետարանն ահազանգին դեռ չի պատասխանել» վերտառությամբ հրապարակմամբ:  Որին հաջորդել էր Երևանի քաղաքապետարանի պատասխանը՝ ««Սարյան պուրակում գործող վերնիսաժը շարունակելու է գործել»․ Երևանի քաղաքապետարանն արձագանքում է ահազանգին»: