05.05.2024 | 16:18
Փլուզում Սիմեոն Երևանցու փողոցում
Խաչատուրովն ու Սերժ Սարգսյանն ինչ են պայմանավորվել 2016-ին Մոսկվայում. Քոչարյանը պնդում է՝ բացահայտված է․ ՏԵՍԱՆՅՈՒԹ
Քաղաքականություն
02.04.2021 | 21:16
2016 թվականի պատերազմի 5-րդ տարում Ազգային ժողովի Ապրիլյան պատերազմի հանգամանքներն ուսումնասիրող քննիչ հանձնաժողովի անդամ, «Լուսավոր Հայաստանից» պատգամավոր Գևորգ Գորգիսյանը սկանդալային բացահայտումներ է անում հանձնաժողովի կազմած զեկույցից: Ընդդիմադիր պատգամավորը պնդում է՝ ԶՈՒ Գլխավոր շտաբի ներկայիս պետ Արտակ Դավթյանը, որը քառօրյայի ժամանակ զբաղեցրել է ԳՇ օպերատիվ վարչության պետի պաշտոնը, ապրիլյան պատերազմի հիմնական մեղավորներից է:
Թե Արտակ Դավթյանը պետության համար ճակատագրական ինչ թերացումներ է թույլ տվել՝ Գևորգ Գորգիսյանը չի բացահայտում։ Ասում է՝ իշխանափոխությունից հետո կհարուցվեն քրեական գործեր, որոնք կտան բոլոր հարցերի պատասխանները:
Քառօրյա պատերազմում Արտակ Դավթյանի թերացումների մասին իշխանությունից ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը խոսել էր դեռ 2020 թվականի նոյեմբերի 16-ին, երբ Դավթյանը լքել էր Ռազմարդյունաբերության կոմիտեի նախագահի պաշտոնը: Այսօր Factor TV-ի հետ զրույցում խոսելով այդ մասին՝ Քոչարյանն ավելի մեղմ ձևակերպումներ օգտագործեց: Օրինակ՝ Արտակ Դավթյանը պետք է ուսումնասիրի քննիչ հանձնաժողովի բացահայտումները և հետևություններ անի: Անդրանիկ Քոչարյանն այսօր արդեն մեղավորների այլ անուններ տվեց և շեշտեց, որ բացահայտել են, թե Սերժ Սարգսյանն ու Յուրի Խաչատուրովն ինչ խոստում են տվել 2016-ի քառօրյա պատերազմը դադարեցնելու դիմաց:
Ինքը՝ Արտակ Դավթյանը, իրեն վերագրվող մեղադրանքերը չի մեկնաբանում։ Այսօր Factor TV-ի հարցերին ի պատասխան նա ասաց, որ տեղեկություններ չունի, թե հանձնաժողովի անդամներն իրեն ինչի համար են մեղադրում:
Քառօրյա պատերազմի ժամանակ Արտակ Դավթյանի և մյուս բարձրաստիճան պաշտոնյաների կողմից թույլ տրված ենթադրյալ թերություններն ու մեղավորությունները հանրությանը պարզ կդառնան, թե՞ ոչ, արդեն կասկածի տակ է, քանի որ քննիչ հանձնաժողովի կողմից պատրաստված զեկույցը չի հրապարակվելու: Հանձնաժողովը նախագահած Անդրանիկ Քոչարյանն ասում է՝ զեկույցը հրապարակելու հետ կապված խնդիրներ կան, փոխարենը ինքը ելույթով հանդես կգա:
Անդրանիկ Քոչարյանը շեշտում է՝ զեկույցը նաև հատուկ ծառայություններին է հետաքրքրելու: Նա չի բացառում, որ բարձրաստիճան զինվորականները պատասխանատվության կկանչվեն: Քոչարյանը նաև շեշտեց, որ հանձնաժողովը բացահայտել է՝ 2016-ի քառօրյա պատերազմի ժամանակ թերացումներ են եղել նաև ինստիտուտների աշխատանքներում: Նա խոսեց Գլխավոր շտաբի թերացումներից, որն այդ ժամանակ ղեկավարում էր Յուրի Խաչատուրովը:
Քննիչ հանձնաժողովում ընդդիմության ներկայացուցիչ Գևորգ Գորգիսյանի կարծիքով էլ՝ զեկույցը միանշանակ պետք է ներկայացվի հանրությանը և Ազգային ժողովին: Ըստ նրա՝ քաղաքական դրդապատճառներ կան, որ այս իշխանությունները հրաժարվում են հրապարակել այն: Գորգիսյանը վստահեցնում է, որ այս զեկույցով հերքվում են բոլոր այն կեղծ թեզերը, որոնք տարիներ շարունակ վնասել են բանակին:
Ապրիլյան պատերազմի հանգամանքները բացահայտող զեկույցը պատրաստ է նախորդ տարվա նոյեմբերից, նույն ժամանակահատվածում ուղարկվել է նաև ԱԺ նախագահ Արարատ Միրզոյանին: Ուշագրավ է, որ այս զեկույցով բացահայտումներ խոստացող իշխանությունները հիմա կաշկանդվում են հրապարակել այն, ինչը նոր հարցեր է առաջացնելու:
Մանրամասները՝ տեսանյութում։
Նարեկ Կիրակոսյան
