14.12.2025 | 10:52
Ինքնաթիռով տեղափոխումը անցանկալի հետևանքներ կունենար․ նոր մանրամասներ՝ Նոր Նորքում հայտնված «Կարմիր մահիկի» մեքենայի մասին
Կրեմլում հերքել են ԼՂ-ում «Իսկանդեր» օգտագործելու մասին՝ ադրբեջանական կողմի տարածած լուրերը
Քաղաքականություն
02.04.2021 | 15:17
ՌԴ նախագահի մամուլի խոսնակ Դմիտրի Պեսկովը մեկնաբանել է ադրբեջանական կողմի պնդումները, որ Լեռնային Ղարաբաղի տարածքում ադրբեջանցի զինվորականները, իբր, «Իսկանդերի» հրթիռների բեկորներ են հայտնաբերել։
Պեսկովը նշել է, որ «Իսկանդեր» հրթիռային համակարգերը չեն կիրառվել Լեռնային Ղարաբաղում և դա հաստատվել է, գրում է ՌԻԱ Նովոստին։
«Որքանով հասկանում եմ՝ սա նոր տեղեկատվություն է։ Ինձ հայտնի չէ, զինվորականների կողմից զեկուցվել է կամ մեր զինվորականները այդ տեղեկատվությանը մանրամասն տիրապետո՞ւմ են, թե՞ ոչ։ Սա ավելի շատ նրանց իրավասությունն է»,- ասել է Պեսկովը։
Հստակեցնող հարցին՝ արդյո՞ք «Իսկանդեր» կիրառվել է հակամարտության ընթացքում, Պեսկովը պատասխանել է․ «Դուք հիշում եք «Իսկանդերի» հետ կապված պատմությունը, որ դրանք չեն կիրառվել հակամարտության ընթացքում։ Դա հաստատվել է»։
Նշենք, որ ադրբեջանական մամուլում հրապարակումներ կան, որ այսօր Բաքվում «Իսկանդերի» մնացորդներ են ցուցադրում։ Նշվում է, որ դրանք, իբր, հայտնաբերվել են մարտի 15-ին, Արցախի գրավյալ տարածքներում ականազերծման աշխատանքների ժամանակ։
Էմմա Չոբանյան
