Քաղաքականություն
31.03.2021 | 13:23
ԱՄՆ Պետքարտուղարությունը հրապարակել է Աշխարհում մարդու իրավունքների մասին ամենամյա զեկույցը։ Ադրբեջանին նվիրված բաժնում անդրադարձ է կատարվել նաև Արցախյան պատերազմի ընթացքում այդ երկրի կատարած հանցագործություններին։ Բացի այդ՝ զեկույցում խոսվում է պատերազմին Թուրքիայի մասնակցության մասին։
Նշվում է, որ Ադրբեջանը Թուրքիայի աջակցությամբ վերականգնեց 1994 թվականից իր վերահսկողությունից դուրս գտնվող 4 հարակից շրջանները, Ռուսաստանի միջնորդությամբ նոյեմբերի 9-ին կնքված հայտարարությամբ 3 հավելյալ շրջաններ խաղաղ կերպով փոխանցվեցին Ադրբեջանին, ինչպես նաև ռուս խաղաղապահներ տեղակայվեցին տարածաշրջանում։
«1995 թվականից Լեռնային Ղարաբաղի վերջնական կարգավիճակի հարցը միջազգային միջնորդության առարկա է ԵԱՀԿ Մինսկի խմբի համանախագահությամբ»,- ասվում է փաստաթղթում։
Զեկույցում խոսվում է նաև այն մասին, որ Լեռնային Ղարաբաղի պատերազմի ընթացքում Ադրբեջանի կողմից մարդու իրավունքների խախտումներ են թույլ տրվել՝ ներառյալ անօրինական սպանությունները, խաղաղ բնակչության շրջանում զոհերը, անմարդկային վերաբերմունքը։
Էմմա Չոբանյան
