27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Մենք բոլորս մազից ենք կախված․ թուրք կանայք մտահոգ են իրենց անվտանգությամբ․ Reuters
Քաղաքականություն
25.03.2021 | 15:15
Թուրք կանայք մտահոգ են իրենց անվտանգությամբ, քանի որ Ռեջեփ Էրդողանի կառավարությունը դուրս է եկել Եվրոպայի խորհրդի կանանց նկատմամբ բռնության մասին կոնվենցիայից: Այս մասին հայտնում է Reuters-ը՝ վկայակոչելով իր հարցումները։
Նրանցից մեկը՝ Յագմուր Դենլին հայտարարել է, որ հենց այդ միջազգային պայմանագիրն է ժամանակին իրեն օգնել պաշտպանվել իր նախկին զուգակցից ու աշխատել որպես անասնաբույժ։ Սրանից բացի, ծրագիրը թույլ է տվել նրան հասնել օրինախախտի դեմ դատական արգելանքի, որը նրա հանդեպ պարբերաբար խոշտանգումների հասնող բռնություն է կիրառել։ Նա պարզաբանել է, որ փաստաթուղթը թույլ էր տալիս իրեն «մեծապես անվտանգ» զգալ, իսկ այժմ, Կոնվենցիայի դադարեցումից հետո ստիպված է ահ ու սարսափով ապրել։ «Այժմ մենք բոլորս մազից ենք կախված»,- նրա խոսքն է մեջբերում գործակալությունը։
Իրավագետ Ֆերիդա Աքարը, որը մասնակցել է Կոնվենցիայի մշակմանը, հայտնել է, որ համաձայնագրից երկրի դուրս գալու մասին լուրերն իր մոտ ծայրահեղ տխրություն ու հուսալքություն են առաջացրել։ Նրա խոսքով՝ փաստաթղթի ընդդիմադիրները պարզապես չեն ցանկանում, որպեսզի պետությունը կանգնի կանանց պաշտպանության կողմն ընտանեկան բռնությունից։
Ստամբուլաբնակ փաստաբան Ռեզան Եպոզդեմիրը, որը ներկայացնում էր ընտանեկան բռնության հետևանքով սպանված կանանց հարազատների շահերը, Անկարայի կողմից պայմանագրից դուրս գալն անվանել է «սարսափելի» և «իրավաբանորեն սխալ»:
Հավելենք՝ Առողջապահության համաշխարհային կազմակերպության տվյալներով ՝ Թուրքիայում կանանց մոտ 40 տոկոսը իր կյանքում գոնե մեկ անգամ բռնության է ենթարկվում զուգընկերոջ կողմից: Եվրոպայում այս ցուցանիշը գրեթե երկու անգամ ցածր է: Գործակալությունը գրում է, որ վիճակագրության մեջ չներառված փաստացի թվերն էլ ավելի ճնշող են. Վերջին 10 տարվա ընթացքում Թուրքիայում կանանց սպանությունների թիվը եռապատկվել է: Միայն այս տարի տեղի է ունեցել 78 ողբերգական դեպք:
Ստամբուլի կոնվենցիան ստորագրման համար բացվել է 2011 թ. ՝ իր անվանումը ստանալով այն քաղաքից, որտեղ ընդունվել է փաստաթուղթը: Թուրքիան դարձել է առաջին երկիրը, որը ստորագրել է համաձայնագիրը, այն նաև դարձել է առաջինը, որը լքել է այն:
Տաթև Ֆռանգյան
