Թուրքիայում հայտարարել են «Բայրաքթար»-ների դեմ ռուսական ՌԷՊ համակարգերի անարդյունավետության մասին

«Բայքար» ընկերության գլխավոր տնօրեն Հալուք Բայրաքթարը հայտարարել է, որ ռուսական ռադիոէլեկտրոնային պայքարի համակարգերն «անկարող են դիմակայել» թուրքական «Բայրաքթար» անօդաչու թռչող սարքերին, հաղորդում է ՌԻԱ Նովոստին։

«Ռադիոէլեկտրոնային պայքարի ռուսական համակարգերը նույնիսկ մեկ ժամով չկարողացան կանգնեցնել Bayraktar TB2-ը»,- պնդել է նա։

Ընկերության գլխավոր տնօրենը նաև հավելել է, որ իրենք անօդաչուների համար մշակել են ՌԷՊ համակարգերից պաշտպանվելու միջոցներ, այդ պատճառով այն «միշտ օդում կլինի»։

Լրատվամիջոցը գրում է, որ ըստ փորձագետների՝ Ռուսաստանն ունի արդյունավետ տեխնիկա թուրքական անօդաչուների դեմ պայքարում։ Այդպիսի միջոցներից մեկը ՏՈՐ-Մ2ԿՄ զենիթահրթիռային համակարգերն են, որոնք միաժամանակ գտնում են 48 թիրախ, ուղեկցում 10-ին ու խոցում 4-ին։ Ըստ մասնագետների՝ Bayraktar TB2-ը «ոչ մի շանս չունի», եթե հայտնվի այդ համակարգերի գոտում։ Գործակալությունը նաև նշում է, որ ՆԱՏՕ-ի զեկույցի համաձայն՝ ռուսական «Պանցիր C-1» զենիթահրթիռային համակարգերն իդեալական են օդաչուների դեմ պայքարում։
Հիշեցնենք, որ Արցախյան պատերազմում թուրքական «Բայրաքթար» անօդաչուներն ակտիվորեն կիրառվեցին Ադրբեջանի ԶՈՒ-ի կողմից։ Ռազմական գործողությունների ընթացքում, երբ Թուրքիան սկսեց բացահայտ ռազմական աջակցություն ցուցաբերել Ադրբեջանին, մի շարք երկրներ դադարեցրին Անկարային «Բայրաքթար» անօդաչուների մասեր մատակարարել։ Չնայած հայտարարված էմբարգոյին՝ Թուրքիան հիմա էլ շարունակում է Ադրբեջանին «Բայրաքթար»-ներ մատակարարել, ինչի մասին վերջերս ասել էր «Բայքար» ընկերության տեխնիկական հարցերով տնօրեն, Թուրքիայի նախագահ Էրդողանի փեսա Սելջուկ Բայրաքթարը։

Էմմա Չոբանյան