Եվրասիական տնտեսական հանձնաժողովից գնահատել են Հայաստանի և ԵՄ-ի միջև գործընկերության ընդլայնումը

Հայաստան-ԵՄ Համապարփակ և ընդլայնված գործընկերության համաձայնագիրը, որն ուժի մեջ է մտել 2021 թվականի մարտի 1-ից, նոր հնարավորություններ կստեղծի Եվրասիական տնտեսական միության (ԵՏՄ) համար: Այս մասին ՏԱՍՍ-ին հայտնել է Եվրասիական տնտեսական հանձնաժողովի (ԵՏՀ) կոլեգիայի նախագահի օգնական Իյա Մալկինան:

«Հանձնաժողովում այս համաձայնագրի իրագործումից մենք ավելի շուտ տեսնում ենք նոր հնարավորություններ ինչպես Հայաստանի, այնպես էլ ընդհանուր առմամբ միության համար: Ես կցանկանայի, որպեսզի ԵՏՄ-ԵՄ հարաբերությունները կառուցվեին տնտեսական պրագմատիզմի և հավասարության սկզբունքների վրա՝ ի շահ մեր պետությունների, քաղաքացիների և բիզնեսի», – ասել է նա:

ԵՏՀ Կոլեգիայի նախագահի օգնականը նշել է, որ երրորդ երկրների հետ հարաբերությունների կառուցումը և համաձայնագրերի ձեռքբերումը, այլ ինտեգրացիոն ասոցիացիաների և միջազգային կազմակերպությունների հետ համագործակցումը ինքնիշխան պետությունների ազգային իրավասությունն է: «Մեզ համար Հայաստանը առաջին հերթին Եվրասիական տնտեսական միության անդամ է: Մենք ելնում ենք նրանից, որ ԵՏՄ մասին պայմանագրով և այլ կարգավորիչ փաստաթղթերով ամրագրված բոլոր պարտավորությունները մեր անդամ երկրների համար հիմնարար են», – ասել է Մալկինան:

Հիշեցնենք՝ 2021 թվականի փետրվարի 10-ին Եվրամիությունը տեղեկացրել էր Հայաստանին ԵՄ-ի և ԵՄ համաձայնագրի անդամ երկրների կողմից Հայաստան-ԵՄ համապարփակ և ընդլայնված գործընկերության համաձայնագրի վավերացման գործընթացը ավարտելու մասին: Փաստաթուղթն ուժի մեջ է մտել 2021 թվականի մարտի 1-ից: Այն ստորագրվել էր 2017-ի նոյեմբերի 24-ին Բրյուսելում՝ Արևելյան գործընկերության գագաթնաժողովի շրջանակներում: Համաձայնագիրը համապարփակ փաստաթուղթ է, որը ապահովում է Հայաստանի և ԵՄ-ի գործընկերության ամուր իրավական հիմքը և նախանշում է համագործակցությունը արդարադատության, անվտանգության, տնտեսության, գյուղատնտեսության, կլիմայի, կրթության և գիտության, մշակույթի, առողջապահության ոլորտներում:

Տաթև Ֆռանգյան