Մեկնարկել է « COVID-19-ի դեմ պատվաստումներ» թեմայով իրազեկման դասընթացը. ՀՀ ԱՆ

Մեկնարկել է «Կորոնավիրուսային հիվանդության համավարակի պայմաններում պատվաստումային գործընթացը. COVID-19-ի դեմ պատվաստումներ» թեմայով իրազեկման դասընթացը զանգվածային լրատվության միջոցների ներկայացուցիչների համար. տեղեկացնում են ՀՀ ԱՆ-ից

Ողջունելով մասնակիցներին՝ առողջապահության նախարար Անահիտ Ավանեսյանը կարևորել է լրատվամիջոցների դերը բնակչության իրազեկման և ապացուցողական բժշկության հենքի վրա ճիշտ տեղեկատվության տրամադրման հարցում:

Միջազգային գործընկերները ներկայացրել են Կորոնավիրուսային հիվանդության իրավիճակն աշխարհում. ԱՀԿ-ի դերը COVID-19-ի դեմ պատվաստումների մատչելիության և հասանելիության գործում (COVAX FACILITY), ՄԱԿ-ի մանկական հիմնադրամի դերը կորոնավիրուսային հիվանդության համավարակի դեմ պայքարում:

Հանդիպման ընթացքում քննարկվել են կորոնավիրուսային հիվանդության համաճարակային իրավիճակը և զարգացման միտումները: Որպես հիմնական կանխարգելիչ միջոցառում, որը ամենաարդյունավետն է բոլոր երկրների համար, խոսվել է պատավաստումների, Հայաստանի կողմից ձեռք բերվող պատվաստանյութերի և այն հիմնական ռիսկի խմբերի մասին, որոնք առաջնահերթ կամավորության սկզբունքով ներառվել են այս գործընթացում:

Օրակարգով նախատեսված բրիֆինգի շրջանակներում բանախոսներ առողջապահության նախարար Անահիտ Ավանեսյանը, ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը, Իմունականխարգելման ազգային ծրագրի ղեկավար Գայանե Սահակյանը, Հայաստանի ամերիկյան համալսարանի Թրփանճեան Հանրային առողջապահության ֆակուլտետի դեկան Վարդուհի Պետրոսյանը, ՄԱԿ-ի մանկական հիմնադրամի ներկայացուցիչ Մարիան Քլարկ–Հաթինգը պատասխանել են թեմայի վերաբերյալ հետաքրքրող հարցերին:

Այնուհետև մասնագետները ներկայացրել են կորոնավիրուսային հիվանդության իրավիճակը Հայաստանում, կատարված աշխատանքները, պատվաստումային գործընթացը, այդ թվում սեզոնային գրիպի դեմ։