17.12.2025 | 18:15
Պապոյանն ու Շվեյցարիայի դեսպանը քննարկել են տնտեսության ոլորտում երկկողմ համագործակցության ընդլայնման հնարավորությունները
Փաշինյանը կորցրել է իր հենարանները. մարդկանց 80 տոկոսը դեմ է նրան. Վազգեն Մանուկյան. ՏԵՍԱՆՅՈՒԹ
Քաղաքականություն
26.02.2021 | 13:05
«Հայաստանում ռազմական հեղաշրջման փորձ տեղի չի ունեցել: Նիկոլ Փաշինյանը կարող է ցանկացած մարդու համբերությունից դուրս հանել, հիմա ինքն ուզում է անօրինական ձևով աշխատանքից ազատել ՀՀ ԶՈւ ԳՇ պետ Օնիկ Գասպարյանին, ինչը հակասում է ՀՀ Սահմանադրությանը»,- այսօր «Հայրենիքի փրկության շարժման» հանրահավաքից առաջ լրագրողների հետ զրույցում ասաց շարժման վարչապետի միասնական թեկնածու Վազգեն Մանուկյանը։ Նա հավելեց, որ չի կարող կանխագուշակել, թե ինչ սրացումներ կարող են առաջանալ Փաշինյանի և Գասպարյանի միջև, բայց Հայաստանում իրավիճակ սրողը միշտ Նիկոլ Փաշինյանն է։
Անդրադառնալով դիտարկմանը, որ ընդդիմադիր խմբակցությունների առաջարկով արտահերթ նիստը չի կայացել, Մանուկյանը նշեց. «Քվորում չեն ապահովել, և նիստը տեղի չի ունեցել: Դա մտնում է իշխանությունների այն «պրիոմչիկների» մեջ, որ օգտագործվում է ԱԺ-ում։ Եթե ժողովրդի ճնշումը մեծ լինի, նրանք ստիպված կլինեն ընդառաջել»:
Վազգեն Մանուկյանի խոսքով, իրենց «պլան Ա»-ն իրեն շատ լավ արդարացնում է. «ՀՀ-ում չի մնացել ինստիտուտ, որը չի պահանջում Նիկոլ Փաշինյանի հրաժարականը։ Այսինքն՝ Նիկոլ Փաշինյանը կորցնում է իր հենարանները, և որևէ «պլան Բ»-ի անհրաժեշտություն կարող է և չառաջանա։ «Պլան Բ»-ի նախաձեռնողը դու չես, այլ ժողովուրդը։ Ինչ-որ իրադարձություններից հետո բախում է լինում, ինքն իրեն բռնկվում է»։
Վազգեն Մանուկյանի գնահատականներով՝ ՀՀ-ում բնակչության 80 տոկոսը դեմ է այս իշխանություններին, իսկ այդ մարդկանց մի մասն էլ պահանջում է Փաշինյանի հրաժարականը։
Մանրամասները՝ տեսանյութում:
