07.06.2026 | 10:58
Ոստիկանությունը կոչ է անում «Գինու օրեր»-ի միջադեպին քաղաքական ենթատեքստ չտալ
Հիմնադրամը շուրջ 12 մլրդ է ուղղել զոհված, հաշմված զինծառայողների ընտանիքներին, հայտնի է նրանց թիվը. ՏԵՍԱՆՅՈՒԹ
Հասարակություն
23.02.2021 | 12:06
Զինծառայողների ապահովագրության հիմնադրամի տնօրեն Վարուժան Ավետիքյանն այսօր հրավիրված ասուլիսում ներկայացրեց հիմնադրամի կատարած աշխատանքները:
Նրա խոսքով՝ աշխատանքները տարվել են երեք հիմնական ուղղություններով: Առաջինը՝ զոհված զինծառայողների ընտանիքներին, հաշմանդամություն ձեռք բերած և անհայտ կորած զինծառայողների ընտանիքներին տրված միանվագ և երկարաժամկետ փոխհատուցումներն են:
«Բայց վերջին պատերազմի արդյունքում մենք ունեցանք նաև երկու նոր ծրագիր, որոնք մենք կոչում ենք «Կամուրջ» ծրագրեր: Դրանք ուղղված են ծանր վիրավորում ստացած զինծառայողներին, ինչպես նաև անհայտ կորած զինծառայողների ընտանիքներին: Հաշվի առնելով, որ ծանր վիրավորում ստացած զինծառայողները որոշակի ժամանակ անց են զինհաշմանդամության կարգ ստանում, որոշակի ժամանակահատված կա, որ նրանք կարող են մնալ առանց ֆինանսական միջոցների, և Կառավարության հետ մեկտեղ «Կամուրջ» ծրագիրը իրենց մասով իրականացրինք և իրականացնում ենք»,- նշեց Ավետիքյանը:
Նրա խոսքով՝ երկրորդ ծրագիրը անհետ կորած զինծառայողների ընտանիքներին աջակցության 6-ամսյա ծրագիրն է.« Քանի որ անհայտ կորածը կամ անհայտ բացակայողը իրավական կարգավիճակ է, որը միայն դատարանը կարող է շնորհել, գործընթացը ենթադրում է որոշակի ժամանակի աշխատանք»:
«Իր ստեղծման օրվանից մինչ այս պահը հիմնադրամը սպասարկել է 1528 ընտանիքի, մինչ այս պահը կատարվել է 14 միլիարդ դրամի փոխհատուցում:
Վերջին պատերազմից մինչ այս պահը մենք արդեն ունենք 1111 ընտանիք, որոնց սպասարկում ենք: Նրանց տվել ենք շուրջ 12 միլիարդ դրամի հատուցում: Եվ քանի որ 20 տարվա պարտավորություն ենք ստանձնում, ամեն ամիս մենք կատարում ենք այդ հատուցումները, դրա համար էլ այս թիվը աճողական է
Անհայտ կորած զինծառայողների ընտանիքներին «Կամուրջ»-ի ֆինանսավորման ներքո մենք փոխանցումներ ենք կատարել 803 ընտանիքի՝ 365 միլիոն դրամի ամսական վճարումներ: Հատուցումները կկատարվեն 6 ամսով, ամսական 300 հազար դրամի չափով: Երբ զինծառայողն արդեն անհայտ կորած կամ անհայտ բացակայող կճանաչվի դատարանի որոշմամբ, և ընտանիքը կգա մեզ մոտ հիմնական ծրագրով փոխհատուցումը ստանալու, մենք կհաշվարկենք, թե որքան գումար ենք վճարել տվյալ զինծառայողի շահառուներին, փաստացի վճարվածը կնվազեցնենք միանվագ 10 միլիոն դրամից և տարբերությունը կփոխանցենք իրենց:
Ծանր վիրավորում ստացած 55 զինծառայողների վճարվում է ամսական 300- հազարական դրամ: Շուրջ 17 միլիոն դրամի փոխհատուցումն արդեն կատարված է»,- նշեց հիմնադրամի տնօրենը:
Մանրամասները՝ տեսանյութում:
