Քաղաքականություն
11.02.2021 | 16:10ՀՀ ԱԳ նախարար Արա Այվազյանը այսօր ասել է, որ տեղյակ չէ Դավիթ Բեկ-Գորիս ավտոճանապարհի վերաբերյալ Ադրբեջանի հետ պայմանավորվածության մասին։ Լրագրողների հարցերին պատասխանելիս նա ասել է, որ տեղյակ է միայն նոյեմբերի 9-ի և հունվարի 11-ի պայմանավորվածությունների մասին։
—
Կառավարությունն առաջիկա օրերին կընդունի Արցախի քաղաքացիներին ֆինանսական աջակցություն տրամադրելու վերաբերյալ նոր որոշում: Նախագծի ընդունման պարագայում մարտից Արցախի քաղաքացիներին ևս 4 ամսով կտրամադրվի 68 հազար դրամ աջակցություն՝ յուրաքանչյուր անձի գծով:
—
«2020-ին մենք ռեկորդային թվով վարկեր ենք տրամադրել»։ Այս մասին կառավարության նիստի ժամանակ հայտարարել է վարչապետ Նիկոլ Փաշինյանը։ Նրա խոսքով՝ 36 հազար վարկ է տրամադրվել, որը վեց անգամ ավելին է, քան 2018 թվականի ցուցանիշը։
Նույն թեմայի քննարկման ժամանակ Փաշինյանը ասել է, որ 2020-ին ինտենսիվ այգիները 10 անգամ աճել են 2019 թվականի համեմատությամբ։ Դրանք հիմա կազմում են 518 հեկտար։
—
Անհետ կորած զինծառայողների հարազատները այսօր կրկին բողոքի ակցիա են իրականացրել կառավարության շենքի դիմաց։ Նրանք պահանջում են վերադարձնել իրենց զինծառայող հարազատներին։ Լրագրողների հետ զրույցում ցուցարարների մի մասը դժգոհել է այդ ուղղությամբ աշխատանքի անարդյունավետությունից։
