Չգնահատվելը աշակերտներին թևեր կտա, թե՞ կզրկի մոտիվացիայից. նոր նախագիծը՝ տարակուսանքի առիթ․ՏԵՍԱՆՅՈՒԹ

Կրթության նախարարությունն առաջարկում է հաստատել հանրակրթության նոր պետական չափորոշիչը: Օրերս ԿԳՄՍ փոխնախարար Ժաննա Անդրեասյանը գործադիր մարմնի նիստին ներկայացրեց նախագիծը, որով առաջարկվում է սովորողների միավորային գնահատումն իրականացնել` սկսած 5-րդ դասարանի երկրորդ կիսամյակից՝ էապես կարևորելով ուսուցանող (ձևավորող) գնահատումը:

Այն հանգամանքը, որ մինչև 5-րդ դասարանի երկրորդ կիսամյակը երեխաները չեն գնահատվելու, դպրոցականների և ծնողների շրջանում տարակարծությունների առիթ է տվել:

Կրթության իրավունքի հետազոտող, առարկայական չափորոշիչների մշակման խմբի խորհրդատու-փորձագետ Գոհարիկ Տիգրանյանը շեշտում է՝ այս փոփոխությամբ առավել կկարևորվի սովորելու գործընթացը, ոչ թե բարձր գնահատական ստանալու նպատակը: Ընդգծում է՝ այս կերպ աշակերտն իրեն կզգա կրթական պրոցեսի կենտրոնում. ինքն ավելի կարժևորվի, քան գնահատականը: Աշակերտներին կտրվեն ոչ թե գնահատականներ, այլ որակական բնութագրեր՝թերթիկներ, որտեղ կներկայացվեն նրանց ձեռքբերումներն ու բացթողումները:

Փորձագետի խոսքով՝ կվերանա աշակերտների միջև արհեստական մրցակցությունը: Ըստ նրա՝ նոր իրավիճակում ուսուցիչները նախ պետք է վերապատրաստվեն՝ տարբեր մեթոդների տիրապետելու համար, երկրորդ՝ նրանց հարկավոր է խթանել՝ հավելյալ աշխատանքի դիմաց՝ հավելյալ վճարով:

Նոր նախագծի վերաբերյալ ուսուցիչների տեսակետները ևս տարբեր են: Մի մասը կարծում է, որ փոփոխությունն ամենևին էլ ի նպաստ աշակերտի չէ, մյուս մասը` հակառակը: Առարկայական չափորոշիչների մշակման խմբի խորհրդատուն այդ կարծիքին չէ. նրա համոզմամբ՝չգնահատվելըչի կարող աշակերտների մոտիվացիայի վրա բացասական ազդեցություն ունենալ:

Հավելենք, որ բացասական կամ անբավարար միավորային շեմից հրաժարվելու արդյունքում նախատեսվում է ունենալ առավել արդարացի գնահատում։ «Հատկապես հաշվի առնելով հանրակրթության ներառականությունը՝ կվերացվի երկտարեցիության երևույթը, որը նպաստում է սովորողների առանձին խմբի պիտակավորմանը և սոցիալական մեկուսացմանը, այլ ոչ թե աջակցում նրանց խնդիրների կարգավորմանը»,- նշված է նախագծում:

Մանրամասները՝ տեսանյութում։

Աննա Բաբաջանյան