Իմ հետևում կանգնած, ուղղորդած, հուշած որևէ քաղաքական ուժ չկա. Արտակ Թովմասյան

«Թովմասյան» բարեգործական հիմնադրամի ղեկավար, «Դվին» հյուրանոցի սեփականատեր Արտակ Թովմասյանը քաղաքականությամբ որոշել է զբաղվել՝ ելնելով երկրում տիրող իրավիճակից, քանի որ նոյեմբերի 9-ի կապիտուլյացիայի հայտարարությունը բերել է տագնապալի իրավիճակի։ Այս մասին նա տեղեկացրեց այսօր լրագրողների հետ զրույցում։

Նա ընդգծեց, որ իր հետևում կանգնած, իրեն ուղղորդած, հուշած որևէ քաղաքական ուժ չկա, ընդհակառակը՝ մեծ մասը զարմանում ու հարց են իրեն տալիս, թե դա ինչու է իրեն պետք: «Գիտակից մարդը, որ հասկանում է երկրի, տնտեսության վիճակը, առնվազն պետք է հասկանա, որ մարդ պետք է կամիկաձե լինի, որ դրան գնա։ Ոչ մի հայրենասեր մարդ դրան չէր գնա, որովհետև ավելի խորը ուսումնասիրելուց հետո գոնե միջին մակարդակի տնտեսագետները կասեն, թե ինչ վիճակ է և ինչ կարող է սպասվել մեր երկրին։ Մեր ներկա իշխանությունների հրաժարականը ձգձգելու դեպքում ամեն օր է՛լ ավելի անելանելի վիճակի մեջ կարող է հայտնվել մեր երկիրը»,- նշեց Արտակ Թովմասյանը։

Հարցին, թե ովքեր են ընդգրկված լինելու նրա քաղաքական թիմում, Թովմասյանը նշեց, որ ակտիվ բանակցությունների մեջ են թե՛ սփյուռքի, թե՛ հասարակական կազմակերպությունների ներկայացուցիչների հետ․ «Ունենում ենք հազարավոր նամակներ և առաջարկություններ, ովքեր իրենց մասնակցության ցանկությունն են հայտնում։ Մենք ակտիվ փուլում ենք, քննարկում ենք, հանդիպումներ ենք անցկացնում։ Փորձում ենք ամեն ինչ անել, որպեսզի չսխալվենք մեր թիմակիցների հարցում։ Իհարկե, դա երեք կամ հինգ օրվա աշխատանք չէ։ Կքննարկենք և կասենք՝ ովքեր են լինելու մեր թիմում»,- նշեց նա։

Արտակ Թովմասյանը նշեց, որ իշխանափոխությունը պատկերացնում է միայն օրենքի սահմաններում․ «Ինչպես վարչապետը ժամանակին ասաց, որ ես եկել եմ ոչ թե կառչելու իմ աթոռից, այլ երբ չկարողանամ մի բան անել, թողնելու եմ գնամ։ Հիմա տեսնում ենք հակառակը։ Իմ կարծիքով՝ պետք է պառլամենտի որոշ անդամների գիտակցությունը այնքան բավարարի, որ նրանք չկառչեն իրենց աթոռներից, այլ ազգի համար ամենակարևոր ժամանակահատվածում ճիշտ քայլի դիմեն և հրաժարական տանլով կազմակերպեն թափանցիկ, անկախ ընտրություններ, հնարավորություն տալով ժամանակավոր կառավարության կառավարման»,- նշեց Թովմասյանը։

Վերջինս նշեց նաև, որ երբեք վարչապետի պաշտոնը, կամ այլ պաշտոններ զբաղեցնելու հավակնություններ չի ունեցել, և հիմա էլ չունի, սակայն եթե դրա կարիքը լինի, պահանջը լինի, կմասնակցեն ընտրություններին և կունենան վարչապետի իրենց թեկնածուն։