Իտալական կղզու ֆենոմենը․ ինչո՞ւ Ջիլիո կղզու բնակիչները չեն վարակվում կորոնավիրուսով

Իտալացի գիտնականներն ուսումնասիրում են Ջիլիո կղզու ֆենոմենը, որի բնակիչներից ոչ մեկը չի վարակվել COVID-19- ով, չնայած մայրցամաքից վարակված մարդիկ բազմիցս այցելում են կղզի, իսկ դրա բնակիչները չեն պահպանում սոցիալական հեռավորությունը, գրում է «ՌԻԱ Նովոստին»` նշելով, որ հետազոտության արդյունքները հրապարակված են medRxiv  կայքում:

Ջիլիո կղզին գտնվում է Տոսկանայի ափերի մոտ: Սա Իտալիայի այն սակավաթիվ վայրերից մեկն է, որտեղ տեղի բնակչության շրջանում դեռևս չկա գրանցված COVID-19-ի դեպք․ բոլոր դեպքերը միայն այցելող զբոսաշրջիկների շրջանում են գրանցվել: Միևնույն ժամանակ, այդ զբոսաշրջիկները սերտ կապի մեջ են եղել տեղի բնակիչների հետ, ինչը, սակայն, չի հանգեցրել հիվանդության տարածմանը:

Լաստանավը օրական երկու անգամ այցելում է կղզի ՝ ամեն անգամ մայրցամաքից մոտ տասը մարդ տեղափոխելով այնտեղ: Փոքր կղզին փակ միջավայր է, իսկ նրա գյուղերում բնակչության խտությունը գրեթե ամենաբարձրն է Իտալիայում: 2020-ի գարնանը կղզում սոցիալական հեռավորություն կամ կարանտինային միջոցառումներ իրականացնելու հրաման չի եղել: Այսպիսով, այցելուների շփումը տեղի բնակչության հետ պետք է որ հանգեցներ զանգվածային վարակի, բայց դա տեղի չի ունեցել:

Միլանի համալսարանից գիտնականները՝ Անտոնիո Բոգանիիի գլխավորությամբմ 2020 թ. ապրիլի 29-ից մայիսի 3-ը իրականացրել են ընդարձակ շճաբանական ուսումնասիրություն ՝ հասկանալու համար կղզու բնակիչների՝ կորոնավիրուսի նկատմամբ դիմադրողականության պատճառը: Հեղինակները նպատակ ունեին հայտնաբերել SARS-CoV-2– ի հակամարմինները, ինչպես նաև առանց ախտանշանների դեպքերը, եթե այդպիսիք կային: Արագ թեստին մասնակցել են կղզու երեք հիմնական բնակավայրերի բոլոր մեծահասակները: Սակայն թքի նմուշների մեջ դրական արդյունքներ չեն հայտնաբերվել:

Գիտնականները Ջիլիո կղզում COVID-19-ի սիմպտոմատիկ դեպքերի բացակայությունը բացատրում են երկու պատճառով. նախ, այստեղի օդը մաքրամաքուր է (աղտոտիչների բացակայությունը, ըստ հեղինակների, կարող է որոշիչ դեր ունենալ վարակի տարածումը սահմանափակելու հարցում), երկրորդը՝ կղզու բոլոր բնակիչների մոտ հնարավոր խաչաձև իմունիտետն է կորոնավիրուսի հետ սերտորեն կապ ունեցող էնդեմիկ հարուցիչի նկատմամբ: Հետազոտողներին այս պատճառը ամենահամոզիչն է թվում:

Խաչաձև ռեակտիվ իմունիտետը կարևոր դեր է խաղում վարակին դիմադրողականության հարցում: Ըստ գիտնականների՝ տեղի բնակիչների դիմադրողականությունը SARS-CoV-2- ի նկատմամբ կարող է միջնորդավորված լինել T- լիմֆոցիտների CD4- ի կլոնով, որն արձագանքում է էնդեմիկ կորոնավիրուսների անտիգեններին, որոնք առաջացնում են  մրսածություն:

Տաթև Ֆռանգյան