Պուտինը Փաշինյանին ու Ալիևին առաջարկել է հակամարտության կարգավորման նոր քայլեր քննարկել

ՌԴ նախագահ Վլադիմիր Պուտինը ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ բանակցությունների ընթացքում առաջարկել է քննարկել Ղարաբաղում հակամարտության կարգավորման առանցքային ոլորտներում նոր քայլեր, գրում է ՏԱՍՍ-ը:

Պուտինը նշել է, որ Ղարաբաղի վերաբերյալ հայտարարությունը հետևողականորեն իրականացվում է, ինչը նախադրյալներ է ստեղծում հակամարտության արդար կարգավորման համար:

«Այսօր մենք կարող ենք գոհունակությամբ արձանագրել, որ եռակողմ հայտարարությունը հետևողականորեն իրականացվում է: Համոզված ենք, որ դա անհրաժեշտ նախադրյալներ է ստեղծում հակամարտությանը երկարաժամկետ և լիարժեք լուծում տալու  համար, արդար հիմքի վրա` ինչպես հայ, այնպես էլ ադրբեջանցի ժողովուրդների շահերի համար», – հայտարարել է ՌԴ նախագահը:

Վերջինիս խոսքով ՝ Լեռնային Ղարաբաղում իրավիճակը շարունակում է մնալ հանգիստ, 48 հազար փախստականներ արդեն վերադարձել են տարածաշրջան: «Հիմա իրավիճակը տարածաշրջանում հանգիստ է: Մենք շատ բան ենք անում ներքին տեղահանված անձանց և փախստականների անվտանգ վերադարձի համար: Ավելի քան 48 հազար մարդ արդեն վերադարձել է Ղարաբաղ», – ասել է  ՌԴ ղեկավարը:

Պուտինը նշել է, որ «տարածաշրջանում տնտեսական, առևտրային և տրանսպորտային կապերի ապաշրջափակման, սահմանները բացելու»  խնդիրն առանձնահատուկ ուշադրության է արժանի:

«Ենթադրվում է, որ այդ հարցերով կզբաղվի հատուկ եռակողմ աշխատանքային խումբը, որը նախագահելու են Ռուսաստանի, Ադրբեջանի և Հայաստանի փոխվարչապետները», – ասել է նա:

Տաթև Ֆռանգյան