Քաղաքականություն
24.12.2020 | 21:26
ՄԱԿ-ը գնահատող առաքելություն է ուղարկելու Լեռնային Ղարաբաղ: Այս մասին այսօր կայացած ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Ստացված տեղեկատվության համաձայն ՝ ՄԱԿ-ի ղեկավարությունը որոշում է կայացրել համապարփակ գնահատման առաքելություն ուղարկել Լեռնային Ղարաբաղի հակամարտության գոտի։ Դրան պետք է մասնակցեն մասնագիտացված մարդասիրական գործակալությունների ներկայացուցիչները` տեղում իրավիճակին ծանոթանալու և կարիքավորների կարիքները գնահատելու համար: Ներկայումս շարունակվում է այս առաքելության չափանիշների նախապատրաստումը և համաձայնեցումը: Մեր կողմից, մենք օգտակար և տեղին ենք համարում բոլոր տուժածներին մարդասիրական օգնության տրամադրման ակտիվացումը միջազգային մասնագիտացված կազմակերպությունների միջոցով` կողմերի հետ համաձայնեցնելով: Ռուսաստանի նախարարությունները և գերատեսչությունները նման աշխատանքներ սկսեցին նոյեմբերի 9-ին Ռուսաստանի, Ադրբեջանի և Հայաստանի ղեկավարների եռակողմ հայտարարության ընդունումից անմիջապես հետո, որի շնորհիվ հնարավոր եղավ դադարեցնել ռազմական գործողությունները:
Մենք ողջունում ենք 1954 թ. Հաագայի կոնվենցիայի երկրորդ արձանագրության՝ զինված բախումների դեպքում մշակութային արժեքների պաշտպանության մասին հռչակագիրը, ինչպես նաև ՅՈՒՆԵՍԿՕ-ի անկախ տեխնիկական առաքելություն տարածաշրջան գործուղելու պատրաստակամությունը: Մենք կարծում ենք, որ կարևոր է համաձայն Հռչակագիրի շարունակել աշխատանքը անդամ երկրների և շահագրգիռ այլ կողմերի հետ: Մենք ելնում ենք նրանից, որ ՅՈՒՆԵՍԿՕ-ի մարդասիրական առաքելությունը, որը ստեղծվել է այս կառույցի միջազգային ՀԿ գործընկերների հետ համագործակցությամբ, կարող են հավաքական գնահատական տալ Լեռնային Ղարաբաղի տարածքում բազմակողմանի ժառանգության մշակութային օբյեկտների վիճակի մասին», – հայտարարել է Զախարովան:
Տաթև Ֆռանգյան
