11.10.2026 | 15:59
Վթարային ջրանջատում Մալաթիա-Սեբաստիա և Էրեբունի վարչական շրջաններում
Հրազդան-Երևան երթուղին կրկին սպասարկվում է նախկին սակագնով՝ 400 դրամով. գծատերը կսպասի մինչև ամսվա վերջ
Հասարակություն
12.01.2018 | 12:57
Հրազդան-Երևան երթուղին սպասարկող «Վիլ լայն» ընկերությունը մոտ 10 օր տրանսպորտի ուղեվարձը 100 դրամով թանկացնելուց հետո հունվարի 11-ից կրկին սպասարկում է նախկին 400 դրամով: Այս մասին Factor.am-ին հայտնեց ընկերության տնօրեն Վիգեն Մարկոսյանը՝ նկատելով, որ պատճառը ուղևորների դժգոհությունն էր:
«Ժողովրդի վրա ահավոր է ազդում, մի որոշ ժամանակով փոխել ենք էլի 400, տեսնենք՝ ինչ կլինի, ավելի կոնկրետ՝ մինչև ամսվա վերջ: Մենք հանդիպել ենք ժողովրդի հետ, նաև մամուլի միջոցով ծանոթացել ենք նրանց բողոքներին»,- նշեց ընկերության տնօրենը:
Հիշեցնենք՝ հունվարի 10-ին Factor.am-ը «Հրազդան-Երևան երթուղու ուղեվարձը 100 դրամով թանկացել է. քաղաքացիների արձագանքը» վերտառությամբ հոդվածով անդրադարձել էր նշված երթուղին սպասարկող տրանսպորտի սակագնի բարձրացմանը: Ուղևորները մեզ հետ զրույցում բողոքում էին ուղեվարձի բարձրացումից՝ նշելով, որ միկրոավտոբուսների և տաքսիների ուղեվարձերը հավասարվել են, ուստի իրենք նախընտրում են օգտվել տաքսիներից: Վիգեն Մարկոսյանը մեզ հետ զրույցում հայտնեց՝ կառավարությունից ասել են, որ թանկացումների հետ կապված «մի բան կանեն»: Մարկոսյանը, սակայն, չհստակեցրեց՝ կոնկրետ ում հետ է զրուցել և հնարավոր փոփոխությունների խոստում ում կողմից է ստացել:
«Հույս ունենք, որ վառելիքի շուկայում գնային փոփոխություն կլինի: Եթե փոփոխություն չլինի, ապա փետրվարից նորից կբարձրացնենք»,- շեշտեց գծատերը:
Հիշեցնենք՝ հունվարի 1-ից ուժի մեջ մտած նոր Հարկային օրենսգրքի հետևանքով թանկացել են դիզելային վառելիքը, բենզինն ու սեղմված գազը:
