16.12.2025 | 16:05
Մայր Աթոռի արձագանքը՝ պատարագների ընթացքում կաթողիկոսի անունը զեղչելուն
Կստեղծվի հակակոռուպցիոն կոմիտե. 2021-23 թթ.-ին բյուջեից 8 միլիարդ 203 միլիոն դրամ կհատկացվի կառույցին
Քաղաքականություն
02.12.2020 | 22:38
Հայաստանում հակակոռուպցիոն կոմիտե կստեղծվի: Հակակոռուպցիոն կոմիտեն լինելու է ենթադրյալ կոռուպցիոն հանցագործությունների հետաքննության և նախաքննության կազմակերպման և իրականացման իրավասու պետական մարմին:
Արդարադատության նախարարության ներկայացրած հիմնավորման համաձայն՝ նման կառույց ունենալու անհրաժեշտությունը պայմանավորված է այն հանգամանքով, որ ներկայումս ՀՀ-ում քրեական գործերով նախաքննություն կատարում են ՀՀ քննչական կոմիտեի, ՀՀ հատուկ քննչական ծառայության, ՀՀ ազգային անվտանգության, հարկային և մաքսային մարմինների քննիչները: Այսինքն՝ կոռուպցիոն հանցագործությունների քննությունը մեկ մարմնի կողմից չի իրականացվում, մինչդեռ կոռուպցիոն հանցագործությունների քննության արդյունավետությունը կարող է երաշխավորված լինել միայն այն պարագայում, երբ այդ գործառույթը վերապահված է մեկ մասնագիտացված մարմնի՝ այդպիսով ապահովելով միասնական չափանիշներով քննության կազմակերպումը:
Նշվում է նաև, որ ՀՀ քրեական դատավարության օրենսգրքի առանձնահատկություններով պայմանավորված՝ հետաքննության և նախաքննության գործառույթները, կոռուպցիոն հանցագործություններով օպերատիվ-հետախուզական գործողությունները իրականացվում են տարբեր մարմինների կողմից, ինչն իր հերթին հանգեցնում է կոռուպցիոն հանցագործությունների քննության ապակենտրոնացվածության: Այսպիսով՝ հակակառուպցիոն կենտրոնի ստեղծման արդյունքում միավորվում են ԱԱԾ-ի, ՔԿ-ի և հարկային և մաքսային մարմինների քննչական ստորաբաժանումները:
Հակակոռուպցիոն կոմիտե ունենալու համար 2021-23 թվականներին պետական բյուջեից կհատկացվի 8 միլիարդ 203 մլն 983 հազար դրամ: Այսպիսով՝ այս գումարից աշխատավարձի, կոմունալի և գրասենյակային ծախսերը կկազմեն 5 մլրդ 163 մլն 483 հազար 900 ՀՀ դրամ (նախնական հաշվարկ): Շենքային պայմանների ծախսերը՝ 2 մլրդ 563 մլն դրամ, տեխնիկական հագեցվածության համար կհատկացվի 285 մլն 500 հազար դրամ, իսկ տրանսպորտային հագեցվածության համար՝ 192 մլն դրամ:
Հակակոռուպցիոն կոմիտեի նախագահի ընտրությունը կատարելու համար ձևավորվելու է մրցութային խորհուրդ: Խորհուրդը ձևավորվելու է Կառավարության, Ազգային ժողովի, Բարձրագույն դատական խորհրդի, Մարդու իրավունքների պաշտպանի և քաղաքացիական հասարակության կողմից առաջադրած մեկական թեկնածուներից։ Խորհրդի կազմում խորհրդակցական ձայնի իրավունքով ներգրավում են երեք միջազգային փորձագետ: Նախագահին նշանակում է վարչապետը՝ վեց տարի ժամկետով: Նրա աշխատավարձն առանց հարկման կկազմի 957 հազար դրամ:
Նարեկ Կիրակոսյան
