Քաղաքականություն
30.11.2020 | 11:26
Ըստ Ֆրանսիայի ՆԳՆ վերջնական տվյալների՝ «Գլոբալ անվտանգության մասին» օրինագծի դեմ շաբաթ օրը Ֆրանսիայում կայացած բողոքի ցույցերի ընթացքում վիրավորվել է 98 ոստիկան: Այս մասին Twitter- իր միկրոբլոգում հայտնել է հանրապետության ներքին գործերի նախարար Ժերալդ Դարմանեն:
«Ամփոփ տվյալներ. 98 վիրավոր ոստիկանների և ժանդարմների շրջանում: Ես նրանց իմ լիակատար աջակցությունն եմ հայտնում: Այս բռնություն կատարողները պետք է պատասխան տան», – գրել է նա:
Ավելի վաղ հաղորդվել էր բողոքի ցույցերի ընթացքում տարբեր աաստիճանի ծանրության վնասվածքներ ստացած ոստիկանության 62 աշխատակիցների մասին:
Միևնույն ժամանակ, ըստ ՆԳՆ տվյալների՝ երկու ցուցարար դիմել է ոստիկանության Գլխավոր վարչություն` բողոքելով ոստիկանների կողմից բռնության ենթարկվելու դեմ: Հայտնի է նաև, որ բողոքի ցույցի ժամանակ սիրիացի անկախ լուսանկարիչ Ամիր ալ-Հալբին վիրավորվել է գլխի շրջանում: «Լրագրողներ առանց սահմանների» կազմակերպության գլխավոր քարտուղար Քրիստոֆ Դելուարը դատապարտել է 24-ամյա ֆոտոլրագրողի նկատմամբ «ոստիկանության անընդունելի բռնությունը»:
Ֆրանսիայում բողոքի ցույցերի ընթացքում իրավապահները բերման են ենթարկել անկարգություններին մասնակցած ավելի քան 80 մարդու:
Հիշեցնենք՝ շաբաթ օրը Ֆրանսիայի 70 քաղաքներում բողոքի ցույցեր են ընթացել ընդդեմ «Գլոբալ անվտանգության մասին» օրենքի նախագծի: Հանրահավաքի մասնակիցները հատկապես դժգոհում են սույն օրենքի 24-րդ հոդվածի դեմ, որը նախատեսում է տուգանքներ ոստիկանության առանձին աշխատակիցներին լուսանկարելու և նկարահանելու համար, եթե այն «սպառնում է առանձին պաշտոնատար անձանց ֆիզիկական անձեռնմխելիությանը»:
Բողոքի զանգվածային ցույցերի կազմակերպիչներն են լրագրողների արհմիությունները, Մարդու իրավունքների պաշտպանության լիգան և այլ հասարակական միավորումներ:
Տաթև Ֆռանգյան
