03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Ադրբեջանը բողոքի նոտա է փոխանցել Ֆրանսիայի դեսպանին
Քաղաքականություն
26.11.2020 | 20:02
Բաքվում Ֆրանսիայի դեսպան Զաքարի Գրոսսը հրավիրվել է Ադրբեջանի ԱԳ նախարարություն՝ Ֆրանսիայի Սենատի կողմից Արցախի հարցով ընդունված բանաձևի պատճառով, փոխանցում է ՏԱՍՍ-ը։
«Դեսպանին Ադրբեջանի ԱԳՆ-ի կողմից բողոքի նոտա է հանձնվել՝ Ֆրանսիայի Սենատի կողմից Լեռնային Ղարաբաղի Հանրապետությունը ճանաչելու անհրաժեշտության մասին բանաձևի ընդունման կապակցությամբ»,- ասվում է Ադրբեջանի ԱԳՆ-ի հայտարարությունում:
Նշվում է, որ դեսպանը խոստացել է պաշտոնական Բաքվի դիրքորոշումը փոխանցել Ֆրանսիայի իշխանություններին:
Հիշեցնենք՝ Ֆրանսիայի Սենատն ընդունեց Արցախի անկախությունը ճանաչելու անհրաժեշտության վերաբերյալ բանաձևը՝ 305 կողմ և 1 դեմ ձայների հարաբերակցությամբ: Քվեարկությանը մասնակցել է 306 սենատոր:
«Լեռնային Ղարաբաղի Հանրապետությունը ճանաչելու անհրաժեշտության մասին» վերնագրված բանաձևով կոչ է արվում Ֆրանսիայի կառավարությունը ճանաչել Լեռնային Ղարաբաղի անկախությունը՝ տարածաշրջանում տևական խաղաղություն հաստատելու համար: Բանաձևը նաև դատապարտում է Ադրբեջանի ռազմական ագրեսիան, որն իրականացվել է Թուրքիայի իշխանությունների և օտարերկրյա վարձկանների աջակցությամբ, և կոչ է անում, որպեսզի անհապաղ դուրս բերվեն ադրբեջանական զինված ուժերը և նրանց աջակիցները այն տարածքներից, որոնք վերցվել են սեպտեմբերի 27-ից սկսված պատերազմական գործողությունների արդյունքում:
Տաթև Ֆռանգյան
