17.09.2026 | 19:38
Մինսկի փողոցում սեպտեմբերի 18-ից կկազմակերպվեն հետիոտնային անցում և հասարակական տրանսպորտի կանգառներ
Ահաբեկչություններից զոհերի թիվն ամբողջ աշխարհում 5-րդ տարին անընդմեջ նվազում է․ GTI
Քաղաքականություն
25.11.2020 | 22:22
Ամբողջ աշխարհում ահաբեկչությունների զոհերի թիվը նվազում է 5-րդ տարին անընդմեջ։ 2019 թվականին ահաբեկչությունների հետևանքով զոհվել է 13 936 մարդ՝ 15%-ով պակաս, քան մեկ տարի առաջ։ Այս մասին են վկայում Ահաբեկչության միջազգային ինդեքսի (GTI) տվյալները, որը հրապարակվել է այսօր, գրում է DW-ի ռուսական ծառայությունը։
Զեկույցում նշվում է, որ ահաբեկչության գլխավոր խնդիր են շարունակում մնալ զինված հակամարտությունները։ Ընդ որում, իրավիճակը նկատելիորեն բարելավվել է Աֆղանստանում ու Նիգերիայում։ Դա պայմանավորված է նրանով, որ «Իսլամական պետություն» (ԻՊ) և «Ալ-Շաբաբ» ահաբեկչական խմբավորումները ուժեղ ճնշման տակ են հայտնվել:
Միևնույն ժամանակ, ըստ զեկույցի, Աֆղանստանն ու Նիգերիան միակ պետություններն են, որտեղ ահաբեկչության զոհերի թիվը դեռևս գերազանցում է 1․000-ը: Ընդհանուր առմամբ, փորձագետները նշել են իրավիճակի բարելավում 103 երկրներում:
Ըստ GTI-ի՝ 2019 թվականի ամենասարսափելի ահաբեկչական խմբավորումը մնացել է իսլամիստական արմատական «Թալիբան»-ը Աֆղանստանում: Միաժամանակ, թալիբների կողմից հարձակումների հետևանքով զոհերի թիվը նվազել է 18 տոկոսով:
Նվազել է նաև ԻՊ-ի ուժն ու ազդեցությունը. այս ծայրահեղական խմբավորման հիմնադրումից ի վեր առաջին անգամ 1․000-ից պակաս մարդ է սպանվել ԻՊ գրոհայինների կողմից:
Տաթև Ֆռանգյան
