17.12.2025 | 11:33
Տեր Շտեգենը վերադարձել է խաղադաշտ ու մասնակցել «Բարսելոնայի» հաղթանակին․ ՏԵՍԱՆՅՈՒԹ
Էմանուել Մակրոնը քննադատել է ՄԱԿ-ի Անվտանգության խորհրդի ներկայիս ձևաչափը
Քաղաքականություն
16.11.2020 | 12:09
Ֆրանսիայի նախագահ Էմանուել Մակրոնը քննադատել է ՄԱԿ-ի Անվտանգության խորհրդի ներկայիս ձևաչափը՝ նշելով, որ այն այսօր ոչ մի օգտակար որոշում չի կայացնում։ Այս մասին Մակրոնը հայտարարել է Grand Continent-ին տված հարցազրույցում, գրում է DW-ի ռուսական ծառայությունը։
Ֆրանսիան ՄԱԿ-ի ԱԽ 5 մշտական անդամներից մեկն է, որն ունի վետոյի իրավունք։ Ֆրանսիայից զատ՝ նման իրավունք ունեն նաև ԱՄՆ-ը, Չինաստանը, Մեծ Բրիտանիան ու Ռուսաստանը։
Մակրոնը նաև հայտարարել է, որ Եվրոպան պետք է ավելի շատ անկախություն ունենա, այդ թվում ՝ պաշտպանության հարցում։
«Ամերիկացիները կկարողանան եվրոպացիներին դաշնակից ճանաչել միայն այն դեպքում, եթե նրանք լրջորեն վերաբերվեն իրենք իրենց ու անկախ լինեն սեփական պաշտպանական քաղաքականությունում»,- ընդգծել է Ֆրանսիայի նախագահը՝ հավելելով, որ Եվրոպան ԱՄՆ-ի ու Չինաստանի նման կշարունակի աշխատել սեփական ինքնավարության ուղղությամբ։
Նշենք, որ համաշխարհային անվտանգության նոր ճարտարապետության շուրջ բանավեճը նոր չէ։ Գերմանիայի ԱԳ նախարար Հայկո Մաասը հանդես է գալիս Եվրամիության Անվտանգության խորհրդի ստեղծման օգտին՝ «վայր, որտեղ եվրոպացիները կկարողանան համատեղ աշխատանք տանել միջազգային քաղաքականության ու անվտանգության ոլորտում»։
Միևնույն ժամանակ, ըստ Մաասի, Մեծ Բրիտանիան պետք է մասնակցի ԵՄ Անվտանգության խորհրդի աշխատանքներին նույնիսկ այն բանից հետո, երբ դուրս կգա Եվրամիության կազմից, իսկ ԱՄՆ-ը պետք է դառնա այս մարմնի կարևոր գործընկերը:
Տաթև Ֆռանգյան
