01.04.2026 | 10:18
Թրամփը հայտարարել է, որ ԱՄՆ-ը հասել է իր նպատակներին և «շուտով» կդադարեցնի Իրանի վրա հարձակումները
Բաքուն որոշել է բողոքի նոտա ուղարկել Բեռլին՝ Արցախ Բունդեսթագի պատգամավորների այցի կապակցությամբ
Քաղաքականություն
19.10.2020 | 23:02
Բաքուն որոշել է բողոքի նոտա ուղարկել Բեռլին՝ Գերմանիայի Բունդեսթագի «Այլընտրանք Գերմանիայի համար» (AfD) կուսակցության պատգամավորների Արցախ այցի կապակցությամբ։ Այս մասին հայտարարել է Ադրբեջանի ԱԳՆ մամուլի ծառայության ղեկավար Լեյլա Աբդուլաևան։
«Հոկտեմբերի 18-ին պատվիրակությունը, որի կազմում եղել են «Այլընտրանք Գերմանիայի համար» կուսակցությունից Բունդեսթագի պատգամավորներ Շտեֆեն Կոտրեն, Շտեֆեն Կոյտերը, Անդրեաս Գալաուն և Անդրեաս Կալբիցը, այցելել են Լեռնային Ղարաբաղ։ Գերմանիայում Ադրբեջանի դեսպանությունը բողոքի նոտա կուղարկի Գերմանիայի ԱԳՆ՝ այս անօրինական այցի կապակցությամբ»,- ասել է նա։
Աբդուլաևան հավելել է, որ բոլոր չորս պատգամավորներն արդեն ներառված են Ադրբեջանի «անցանկալի անձանց» ցանկում՝ 2019 թվականին Լեռնային Ղարաբաղ այցելելու հետ կապված։
Նշենք, որ գերմանացի խորհրդարանականները որոշել են Արցախ այցելել՝ տեղում ստեղծված իրավիճակին ծանոթանալու և իրադրության մասին սեփական պատկերացումը կազմելու համար։ Ստեփանակերտում հրավիրված ասուլիսում նրանք խոսել են ադրբեջանա-թուրքական ագրեսիայի անթույլատրելիության մասին։
