Խաղաղության կոչերով դիմող ադրբեջանցիները ենթարկվում են ճնշումների ու սպառնալիքի. OC media

Խաղաղությանն աջակցող ադրբեջանցի ակտիվիստներ Նարմին Շահմարզադեն ու Գիյաս Իբրահիմովը հայտարարել են, որ իրենց հրավիրել են դատախազություն՝ հարցաքննության համար։ Նարմին Շահմարզադեն իր ֆեյսբուքյան էջում գրել է, որ Գիյաս Իբրահիմովին մեքենայով ստիպողաբար տարել են, իրեն էլ զանգով տեղեկացրել, որ ներկայանա դատախազություն։ Այս մասին գրում է OC media-ն։

Այնուհետ Իբրահիմովը հրապարակել է իրեն դատախազություն հրավիրող փաստաթղթի լուսանկարը։

«Ուզում եք ինձ ձերբակալել, արեք, ինչ ուզում եք»,- գրել է ակտիվիստը։

Նշենք, որ ավելի վաղ ևս Իբրահիմովին խաղաղության կոչեր հնչեցնելու համար ձերբակալվել էր Ադրբեջանի հատուկ ծառությունների կողմից։

Ադրբեջանցի այս երկու ակտիվիստները Հայաստանից, Ադրբեջանից ու ամբողջ աշխարհից այն մարդկանց թվում են, որոնք ստորագրել են խաղաղությանն ուղղված կոչը։ Նրանցից բացի՝ խաղաղության կոչը ստորագրած այլ ադրբեջանցիներ ևս հաղորդում են, որ համացանցում ենթարկվում են ճնշումների ու սպառնալիքի։

Ակտիվիստներից Ժալե Բայրամովան էլ OC Media-ի պատմել է, որ իր հասցեին տարբեր մեղադրանքներ ու սպառնալիքներ են հնչեցվում։ Նրան մեղադրում են դրսից գումար ստանալու ու հակադրբեջանական գործունեություն ծավալելու համար։

Սպառնալիքների պատճառով ադրբեջանցի ատիվիստներից մեկը խնդրել է իր ստորագրությունը հեռացնել խաղաղությանն աջակցողների ցանկից։

Միաժամանակ, ադրբեջանցի օգտատերերից մեկը հրապարակել է խաղաղության կոչը ստորագրած ադրբեջանցիների անունները՝ նրանց անվանելով ազգի դավաճաններ։

Էմմա Չոբանյան