Առանց կրթության հնարավոր չէ տիեզերք թռնել․ Նիկոլ Փաշինյան. ՏԵՍԱՆՅՈՒԹ

Վարչապետ Նիկոլ Փաշինյանը մասնակցել է Երևանի Ռաֆայել Իշխանյանի անվան թիվ 153 հիմնական դպրոցի բացման արարողությանը։ Վարչապետը խնդրել է աշակերտներին և ուսուցիչներին՝ պահպանել հակահամաճարակային կանոնները՝ ի նպաստ բոլորիս առողջության։

«21-րդ դարում առանց կրթության ոչինչ անել հնարավոր չէ։ Մտածեցի, որ մեր երեխաները հիմա շատ քննադատաբար են վերաբերվում ամեն ինչին, և նա, ով քննադատաբար է վերաբերվում, այս նախադասությունն իր մեջ վերլուծելով՝ կարող է, օրինակ, արձագանքել այսպես. առանց կրթության հնարավոր է «Յաշիկ Մերսեդես» առնել: Այո՛, այս նախադասությունը կարող է գոյություն ունենալ: Բայց եթե հնարավոր է առանց կրթության ձեռք բերել G կարգի «Մերսեդես», առանց կրթության հնարավոր չէ ստեղծել G կարգի «Մերսեդես»… Մենք ինչպիսի՞ ապագա ենք ուզում Հայաստանի համար՝ G կարգի «Մերսեդես» միայն վարողնե՞ր լինեն, թե՞ ուզում ենք լինել դրա ստեղծողը, արտադրողը: Մենք ուզում ենք լինել սպառո՞ղ, թե՞ ստեղծող: Առանց կրթության, այո՛, հնարավոր է ինչ-որ աստիճանի նյութական բարեկեցություն ստեղծել, բայց առանց կրթության հնարավոր չէ տիեզերք թռնել, և ես ուզում եմ, որ սա լինի մեր ընտրությունը»,- դպրոցի բացման արարողության ժամանակ ունեցած ելույթում ասել է Նիկոլ Փաշինյանը:

Վարչապետը նաև հավելել է, որ մեծագույն նպատակն ու խնդիրն է, որ Հայաստանում կրթությունը, սովորելը լինի ազգային ապրելակեպ, կենսակերպ. «Միայն սովորելով, գիտելիքով, կրթությամբ է, որ կարող ենք ճանաչել մեր խնդիրները և դրանց լուծում գտնել»:

Մանրամասները՝ տեսանյութում: