«Իշխանությունը դատապարտեց ոչ թե վատ Սամվելին, այլ լավ Սամվելին, որն ուզում էր ժողովրդի կողքին կանգնել»․ Վահան Բադասյան

Արցախյան պատերազմի վետերան, Արցախի պաշտպանության բանակի գումարտակի նախկին հրամանատար Վահան Բադասյանը Factor.am-ի հետ հարցազրույցում ասում է, որ Արցախի բանակի նախկին հրամանատար Սամվել Բաբայանին «Իգլայի» ու փողերի լվացման գործով 6 տարի ազատազրկելով՝ Հայաստանի արդարադատության համակարգը «կոխկրտեց մարդկային բոլոր նորմերը»։

«Նախ սխալ մեղադրանք էր ներկայացված Սամվել Բաբայանին, հետո տեսան՝ «Իգլան» չի կպնում, արդեն խոսեցին փողերի լվացումից»,- ասաց Բադասյանը։

Ըստ նրա՝ Սամվել Բաբայանը քաղբանտարկյալ է՝ անկախ նրանից, ինքն իրեն քաղբանտարկյալ համարում է, թե ոչ, քանի որ Բաբայանին ձերբակալելով՝ իշխանությունը միանգամից թևաթափ արեց ՕՐՕ դաշինքի անդամներին ու համակիրներին։

«Ես Սամվել Բաբայանի հետ ունեցել եմ շատ լավ հարբերություն մինչև 1993 թվականը, հետո շատ վատ հարաբերություն մինչև 98 թվականը, հետո՝ չեզոք, որովհետև ինքն արդեն դատված ու նստած էր, բայց հետո անձամբ ինքը զանգեց, մենք հանդիպեցինք անցած տարի ընտրություններից առաջ։ Մենք խոսեցինք, և ես տեսա այն նույն Սամվել Բաբայանին, ինչպիսին ինքը կար մինչև 91-92 թվականը։ Գոնե ես գտնում եմ, որ իրենք դատապարտեցին ոչ թե վատ Սամվելին, որը վատ կողմեր ուներ իր պաշտոնավարման տարիներին, այլ բռնադատեցին լավ Սամվելին, երբ որոշեց փոխվել ու ուզում էր կանգնել ժողովրդի կողքին»,- ասաց Վահան Բադասյանը։

Արցախի բանակի գումարտակի նախկին հրամանատարը, անդրադառնալով պաշտպանության խնդրին, նշեց, որ հաղթանակի համար զինվորին անհրաժեշտ է համընդհանուր արդարության զգացումը, որը, ի տարբերություն Արցախյան պատերազմի տարիների, այսօր չկա։

«Այն ժամանակ մենք մարտը շահել ենք ու տարածքներ ենք ազատագրել ոչ թե զինատեսակների կամ մարդկային ուժի շնորհիվ, այլ մեզ մոտ առավել էր արդարության զգացումը, կազմակերպվածությունը, որը գալիս էր դրանից։ Եթե սով էր, բոլորի համար էր սով, եթե հաց կար, բոլորի համար էր հացը։ Եվ արդարությունն ու կազմակերպվածությունը մեզ բերեց հաղթանակ։ Արդարությունը շատ կարևոր գործոն է պաշտպանության համար։ Այսօր դրա մասին խոսելն անգամ ավելորդ է»,- նշեց Բադասյանը։

Մանրամասները դիտեք Վահան Բադասյանի հետ Factor.am-ի հարցազրույցում։

Մարինե Խառատյան