10.02.2026 | 23:52
Հայաստանի մի շարք հասցեներում էլեկտրաէներգիայի անջատումներ կլինեն
Վրաստանի խորհրդարանի 21 «լուռ» պատգամավորները. 3-ը հայ են
Քաղաքականություն
03.08.2020 | 17:17
«Միջազգային թափանցիկություն. Վրաստան» կազմակերպության զեկույցի համաձայն` նախորդ տարի Վրաստանի խորհրդարանի 21 պատգամավոր ոչ մի անգամ չի օգտվել ամբիոնից ելույթի իրավունքից, փոխանցում է aliq.ge-ն։
Ըստ կազմակերպության` «լուռ» պատգամավորները ներկայացնում են «Վրացական երազանքը»: Նրանց թվում են նաև հայազգի պատգամավորներ Ռուսլան Պողոսյանը, Հենզել Մկոյանը և Սամվել Մանուկյանը:
Ի դեպ` Վրաստանի իշխող «Վրացական երազանք» կուսակցությունը Ախալքալաքի և Նինոծմինդայի մեծամասնական շրջանում որպես մեծամասնական պատգամավորի թեկնածու կուսակցությունն առաջադրել է Սամվել Մանուկյանին: Ըստ կուսակցության գործադիր քարտուղար Իրակլի Կոբախիձեի` «Սամվել Մանուկյանը այսօր էլ ակտիվորեն պաշտպանում է շրջանի բնակչության շահերը Վրաստանի խորհդարանում»:
Իսկ 21 տարի պատգամավորական աթռո զբաղեցրած Հենզել Մկոյանն էլ պատրաստակամություն էր հայտնել կրկին առաջադրվել՝ «բնակիչների ցանկության ու խնդրանքի դեպում»:
«Թրանսփարենսի ինթերնեյշնլ․ Վրաստանի» զեկույցի համաձայն` չնայած ելույթ ունեցող պատգամավորների թիվն աճել է, պատգամավորական ակտիվության պակասը խնդիր է մնում: Ինչ վերաբերում է օրենսդիրի ամենաակտիվ ներկայացուցիչներին, ըստ կազմակերպության զեկույցի` 2019-ին ամենաշատ օրենսդրական նախաձեռնությունների հեղինակը Ռատի Իոնաթամիշվիլին է, իսկ լիագումար նիստերի ամենաակտիվ մասնակիցը խորհրդարանական մեծամասնությունը ներկայացնող Անրի Օխանաշվիլին է, ընդդիմությունից` Էկա Բեսելիան, պատգամավորական հարցերի մեծամասնության հեղինակը Սերգի Կապանաձեն է, ամենաակտիվ կոմիտեն` իրավաբանական հարցերով կոմիտեն է:
