19.12.2025 | 17:34
Արման Ծառուկյան․ Գեյջին ու Փիմբլեթն իմ մակարդակի մարտիկներ չեն
Ծիրանի արտահանումը նվազել է․ նախորդ տարվա 28.000 տոննայի փոխարեն այս տարի արտահանվել է 17.500 տոննա
Տնտեսություն
20.07.2020 | 18:10
Այս տարի Հայաստանից արտահանվել է 17.500 տոննա ծիրան։ Նախորդ տարվա 28 հազար տոննայի համեմատ՝ գրեթե կրկնակի նվազում է գրանցվել, իսկ 2018-ին այդ ցուցանիշը կազմել է 47 հազար տոննա։ Այս մասին Factor.am-ի հետ զրույցում ասաց «Ագրարագյուղացիական միավորում» ՀԿ նախագահ Հրաչ Բերբերյանը։
Նրա խոսքով՝ բերքի ընդհանուր արտահանումը մոտավորապես կհասնի 28-29 հազար տոննայի, այսինքն՝ նախորդ տարվանից դարձյալ 2 անգամ պակաս։ Ըստ Բերբերյանի՝ սա պայմանավորված է փոշոտման խնդիրներով, եղանակային անբարենպաստ պայմաններով և սնկային հիվանդություններով։
«Պետք է ժամանակին գյուղացուն այդ ուսումնական մեթոդական ցուցումները տային, թե գյուղացին ինչ սրսկեր, այդ սնկային հիվանդություններից փրկեր գոնե մինիմալ բերքը։ Ցավոք, դա էլ չեղավ»,- նշեց Բերբերյանը։
Նա հավելեց, որ Կառավարությունը մեծ ուշադրություն պետք է դարձնի մեղվաբուծությանը, քանի որ առանց մեղվի չենք կարող պտուղ ունենալ։
Անդրադառնալով Ռուաստանում հայկական ծիրանի վաճառքի հետ կապված խնդիրներին՝ Հրաչ Բերբերյանը նշեց, որ տեղի ունեցողը բնական էր։
«Քանի որ մենք հարևան հանրապետության քիթը լավ ենք տրորել, նման կոնֆլիկտներ կարող են լինել։ Այստեղ շատ կարևոր էր, որ հայ գործարարները օգնեցին, ճիշտ է՝ այնտեղ քանակ էլ չկար, մի 5-6 մեքենա բան էր մնացել, քանի որ սեզոնը վերջանում է, բայց, համենայն դեպս, քայլ արվեց։ Մեր խորին համոզմամբ՝ մենք հայկական շուկա պետք է ունենանք ինչպես Վրաստանում, այնպես էլ Մոսկվայում։ Սա, երևի, առաջին քայլն է։ Տեսնենք, այդ շուկան, որ Մոսկվայում կա, մյուս տարի էլի կկլանի՞ մեր ֆերմերներին, որովհետև բիզնեսը ազգություն չի հարցնում։ Հայերի մի մասը կգնա էլի հին շուկան, բայց շատ լավ կլիներ, որ հայկական շուկա ունենայինք։ Եվ, իհարկե, տեսականին պետք է մեծացվի, որովհետև վաճառվել է մի մեքենա ծիրան, մի մեքենա կեռաս, մի մեքենա սալոր։ Դա քանակ չէ Մոսկվայի համար»,- նշեց Հրաչ Բերբերյանը։
Անժելա Պողոսյան
