30.04.2026 | 20:48
Մեր ազգն այժմ պետք է կենտրոնանա ներկայի և ապագայի վրա, այլ ոչ թե մնա անցյալում. Արարատ Միրզոյանի հարցազրույցը France 24-ին
Ադրբեջանի Մեջլիսի պատգամավորը Հայաստանի բյուջեն «ռազմականացված» է որակել
Քաղաքականություն
25.11.2024 | 16:10
Ադրբեջանի Միլլի Մեջլիսի այսօրվա լիագումար նիստում «Ադրբեջանի Հանրապետության 2025 թվականի պետական բյուջեի մասին» օրինագծի քննարկման ժամանակ տնտեսական քաղաքականության, արդյունաբերության և ձեռներեցության խորհրդարանական հանձնաժողովի նախագահ Ազեր Ամիրասլանովը հայտարարել է, որ 2025 թվականի բյուջեի նախագծում, ընթացիկ տարվա համեմատ, պաշտպանության և ազգային անվտանգության ֆինանսավորման ծախսերն ավելացել են 17,8%-ով։
«Ադրբեջանը տարածաշրջանում խաղաղություն և կայունություն պահպանելու առաքելություն է իրականացնում։ Այս ծախսերի աճն անհանգստացնում է արտերկրի որոշի շրջանակների։ Պաշտպանական ծախսերի ավելացումը չի նշանակում ռազմականացված քաղաքականություն վարել։ Ռազմական ծախսերի աճը տեղի է ունենում այլ ոլորտներում ծախսերի աճի ֆոնին»,- ասել է պատգամավորը։
Նա, միաժամանակ, հայտարարել է, թե Հայաստանի բյուջեն է ռազմականացված։
«Պաշտպանական ծախսերը մեր երկրի բյուջեի ծախսերում ամենաբարձր տեսակարար կշիռը չունեն։ Բյուջեի ռազմականացման միտումները բնորոշ են հայտնի երկրին։ Հայաստանում, որտեղ գործազրկության մակարդակը հասնում է 12%-ի, որն արդեն 15 տարուց ավելի սուր ժողովրդագրական ճգնաժամ է ապրում, ընդամենը 1 տարվա ընթացքում ռազմական ծախսերի 70%-ով կտրուկ աճը ռազմականացված բյուջեի վառ օրինակն է»,- նշել է պատգամավորը։
Հիշեցնենք, որ 2025 թվականի բյուջեով Ադրբեջանի պաշտպանական և անվտանգային ծախսերն ավելացվելու են՝ կազմելով 8,396,297,596․0 մանաթ (շուրջ 5 մլրդ դոլար)։
Ավելի վաղ էլ Ադրբեջանի նախագահ Իլհամ Ալիևը հայտարարել էր, որ երկրի թիվ մեկ խնդիրը ռազմական հզորության ավելացումն է։
Թարգմանությունը՝ Էմմա Չոբանյանի
