Սամվել Բաբայանն ինձ համար կմնա որպես «Կամանդույուշչի». Ցվետանա Պասկալևա

Լեռնային Ղարաբաղի Պաշտպանության բանակի նախկին հրամանատար Սամվել Բաբայանին 6 տարվա ազատազրկման դատապարտելու փաստը ցավոտ են ընդունել նրան ճանաչող մարդիկ, մարտական ընկերները, համակիրները: Նրանց թվում է բուլղարացի լրագրող, վավերագրող Ցվետանա Պասկալևան:

Factor.am -ի հետ զրույցում նա ասաց. «Ես հավատում եմ այդ մարդուն և միշտ եմ հավատացել: Ես նրան հիշում եմ որպես վաստակավոր մարդ և «Կամանդույուշչի», նա այդպիսին էլ կմնա ինձ համար, որովհետև ես հիշում եմ այն ամենը, ինչ եղել է»:

Պասկալևան չցանկացավ խոսել դատաքննության և Սամվել Բաբայանին ներկայացված մեղադրանքների մասին: «Այս գործով ես ընդամենը կարդում եմ այն, ինչ գրում են կայքերում լրագրողները: Ես ոչ մի անգամ ներկա չեմ եղել դատական նիստերի ժամանակ, փաստերի չեմ տիրապետում և որևէ կարծիք չեմ կարող հայտնել նրան մեղսագրվող, գուցե, վերագրվող արարքների մասին, չգիտեմ, որն է ճիշտ այս դեպքում: Կարծում եմ՝ Դուք, հայ լրագրողներդ, պետք է անեք այն, ինչ անհրաժեշտ է Կամանդույուշչիի համար»:

Նկատելով, որ Սամվել Բաբայանը ժպիտով հեռացավ դատարանի դահլիճից՝ Պասկալևան նշեց. «Նա միշտ ունեցել է բավական ներքին ուժ՝ բոլոր իրավիճակներում բարձրության վրա գտնվելու համար»:

Հիշեցնենք, որ Սամվել Բաբայանը մեղավոր է ճանաչվել մի խումբ անձանց «Իգլա» զենիթահրթիռային համալիր ձեռք բերել, փոխադրել և պահել դրդելու, ինչպես նաև հանցավոր ճանապարհով կեղծ թղթադրամներ ձեռք բերելու մեջ: Բաբայանն իր մեղադրանքը չի ընդունել և իր վերջին խոսքում պատմել է ներկաներին, որ քննիչներն իր հետ հիմնականում քաղաքական զորւյցներ են տարել: Հավելենք որ 2001 թվականին նա դատապարտվել էր ԼՂՀ նախագահ Արկադի Ղուկասյանի դեմ մահափորձ պատվիրելու համար, իսկ երեք տարի անց ներում էր ստացել վերջինիս կողմից:

Սյուզան Սիմոնյան