12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Սամվել Բաբայանն ազատազրկվեց 6 տարով. ԼՂ ՊԲ նախկին հրամանատարի խոսքով՝ «Պատվերը լավ կատարվեց»
Հասարակություն
28.11.2017 | 15:00
Այսօր Կենտրոն և Նորք-Մարաշ ընդհանուր իրավասության դատարանում դատավոր Արշակ Վարդանյանը հրապարակեց ԼՂՀ ՊԲ նախկին հրամանատար Սամվել Բաբայանի և մյսուների գործով դատավճիռը: Ըստ դատավորի որոշման՝ Սամվել Բաբայանն անազատության մեջ կմնա 6 տարի: Դատավճռի հրապարակվելուց հետո Սամվել Բաբայանը հայտարարեց՝ պատվերը լավ կատարվեց, իսկ լրագրողների ճշգրտող հարցին՝ արդյոք պատվիրատուն Սերժ Սարգսյանն էր, ԼՂՀ ՊԲ նախկին հրամանատարը պատասխանեց՝ «դուք ասացիք»:
Հիշեցնենք, որ այս գործով մեղադրանք էր առաջադրված 7 անձի, Սամվել Բաբայանից բացի՝ նրանցից միայն երկուսը պատիժը կկրեն անազատության մեջ՝ Սանասար Գաբրիելյանը 3 տարի ժամկետով և Անդրանիկ Պողոսյանը՝ 2: Մյուսները պայմանականորեն ազատ արձակվեցին։
Նիստի ավարտին Սամվել Բաբայանի համախոհ, «Համախմբում» կուսակցության ներկայացուցիչ Անդրանիկ Թևանյանը հայտարարեց՝ իշխանություններն այս քայլով մեծ հարված հասցրին Հայաստանի Հանրապետությանը. «Մեր իսկ ձեռքերով, մեր բանակն անգամ պատերազմի ժամանակ ղեկավարած մարդուն նեկայացնում ենք որպես հանցագործ, փողերի լվացման մեջ մեղադրվող հանցագործ»:
Հայաստանի խորհրդարանական ընտրություններից օրեր առաջ ձերբակալված Սամվել Բաբայնը մեղադրվում էր «Իգլա» տեսակի զենիթահրթիռային համալիր ձեռք բերելու, ինչպես նաև փողերի լվացման մեջ։ Նրա ազատազրկումը քաղաքական որոշում էր, Factor.am-ի հետ զրույցում ասաց նիստին ներկա, «Ազգային համաձայնություն» կուսակցության նախագահ Արամ Հարությունյանը. «Իշխանությունները վտանգ էին զգում, տեսնելով, թե ինչպես են Արցախում ընդունում Բաբայանին, այստեղ ևս բոլորն ակնածանքով էին նրան վերաբերվում, և մտավախություն ունեին, որ ընտրական և հետընտրական գործընթացներ կսկսվեն: Նրանք Բաբայանին ուղղակի մեկուսացրին, և վեց տարին էլ պատահական չէր հաշված, որ հաջորդ ընտրություններին էլ Սամվել Բաբայնաը ընտրություններից դուրս մնա»:
Սամվել Բաբայանի փաստաբանը՝ Ավետիս Քալաշյանը, չբացառեց վճռի բողոքարկումը, ընդհուպ՝ մինչև Եվրոպական դատարան, սակայն իր պաշտպանյալին քաղբանտարկյալ որակելուց ձեռնպահ մնաց՝ «ես լիազորված չեմ նման հայտարարություն անել»:
Լիլիթ Շաբոյան
