Պուտինն Ուկրաինայում օտարերկրյա զորքերի հնարավոր ներկայությունը Ռուսաստանի համար սպառնալիք է որակել

Ռուսաստանի նախագահ Վլադիմիր Պուտինը հայտարարել է, որ Ուկրաինայում օտարերկրյա զորքերի ներկայությունը Մոսկվայի համար բացարձակապես անընդունելի է, իսկ արտասահմանյան զորքերի հնարավոր տեղակայումը սպառնալիք է Ռուսաստանի ազգային անվտանգությանը։

«Ի սկզբանե մենք հայտարարել ենք, որ Ուկրաինայի տարածքում ցանկացած օտարերկրյա զորքի ներկայությունը մեզ համար բացարձակապես անընդունելի է։ Մենք դա համարում ենք Ռուսաստանի Դաշնության անվտանգության սպառնալիք»,- ասել է նա ԱՄՆ նախագահի հատուկ բանագնացներ Սթիվ Ուիթկոֆի և Ջարեդ Քուշների հետ հանդիպման ժամանակ։

Նա հիշեցրել է, որ ավելի վաղ «բոլորը համաձայնել էին այս հարցում»։

«Ամեն դեպքում, Ստամբուլում կայացած բանակցությունների ընթացքում այս պայմանավորվածությունն ընդունվել էր։ Մինչ այժմ, կարծես թե, ոչ ոք դրան դեմ չէր արտահայտվում։ Եվրոպացիները տեղյակ են այդ մասին։ Իսկ ի՞նչ ենք լսում նրանցից։ Որ խաղաղության հաստատումից անմիջապես հետո նրանք զորքեր կմտցնեն Ուկրաինայի տարածք։ Ի՞նչ է դա նշանակում։ Մենք արդեն խոսել ենք այս մասին․ մեզ համար դա օրինական թիրախ է, այսինքն՝ պատերազմն անմիջապես կվերսկսվի»,- նշել է ՌԴ  նախագահը։

Պուտինն ընդգծել է, որ ԱՄՆ վարչակազմը և նախագահ Դոնալդ Թրամփն այս իրավիճակում առաջարկել են պայմանավորվել Եվրոպայում անվտանգության ապահովման մեխանիզմների շուրջ,ընդհանուր առմամբ։

Նա նաև հայտարարել է, որ Ռուսաստանը կցանկանար, որ ամերիկյան կողմն աշխատի Եվրոպայի հետ, որպեսզի եվրոպական երկրները  կողմնորոշվեն՝ ինչ են ցանկանում՝ խաղաղությո՞ւն, թե՞ պատերազմ Ուկրաինայում։

«Մենք շատ կցանկանայինք, որ դուք՝ հարգելի պարոնայք, ինչպես նաև ամերիկյան վարչակազմն ամբողջությամբ, աշխատեք ձեր եվրոպացի դաշնակիցների հետ, որպեսզի նրանք վերջապես հստակեցնեն իրենց դիրքորոշումը՝ ինչ են ցանկանում՝ խաղաղությո՞ւն, թե՞ պատերազմ Ուկրաինայում»,- նշել է Պուտինը։

ՌԴ նախագահը հայտարարել է՝ Մոսկվան երբեք դեմ չի եղել Եվրոպայի հետ երկխոսությանը, սակայն, ըստ Պուտինի, եվրոպացիներն իրենք են խզել այդ երկխոսությունը։

Թարգմանությունը՝ Էմմա Չոբանյանի