11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Հյուսիսային Կորեան կրկնում է, որ չունի ԱՄՆ-ի հետ հանդիպելու ծրագիր
Քաղաքականություն
05.07.2020 | 17:19
Հյուսիսային Կորեան շաբաթ օրը մեկ անգամ ևս կրկնեց, որ չունի Միացյալ Նահանգների հետ միջուկային ծրագրի շուրջ բանակցությունները վերսկսելու ծրագիր: Բանակցություններ Հյուսիսը չի սկսի, քանի դեռ, ըստ Փհենյանի, Վաշինգտոնը չի հրաժարվել իր նկատմամբ «թշնամական» քաղաքականությունից:
Այս մասին հայտարարությամբ հանդես է եկել Հյուսիսային Կորեայի արտգործնախարարի առաջին տեղակալը, պատասխանելով ԱՄՆ-ի ազգային անվտանգության հարցերով նախկին խորհրդական Ջոն Բոլթոնի այն մեկնաբանություններին, որոնց համաձայն՝ նախագահ Դոնալդ Թրամփը մինչև ընտրությունները, հոկտեմբեր ամսին Հյուսիսի առաջնորդ Կիմ Չան Ընին կարող է հրավիրել մասնակցելու հաջորդ գագաթնաժողովին:
Հարավային Կորեայի նախագահ Մուն Ջաե Ինը, որը եռանդուն աշխատանք է ծավալում Վաշինգտոնի և Փհենյանի միջև բանակցություններ կազմակերպելու ուղղությամբ, ևս հայտնել էր լավատեսություն, որ Թրամփն ու Կիմը կհանդիպեն մինչև ԱՄՆ-ի նախագահական ընտրությունները:
Հիշեցնենք, որ երկու առաջնորդների միջև 2018 թվականից ի վեր հանդիպումներ են անցկացվել երեք անգամ, սակայն Վիետնամում երկրորդ գագաթնաժողովի տապալումից հետո հանդիպում տեղի չի ունեցել: Գագաթնաժողովը շատ արագ էր ավարտվել այն բանից հետո, երբ ԱՄՆ-ը հրաժարվել էր ընդունել միջուկային ծրագրից մասնակիորեն հրաժարվելու դիմաց Հյուսիսի նկատմամբ պատժամիջոցները վերացնելու Կիմ Չան Ընի նախապայմանը:
