Առաջիկայում նոր թանկացումներ կլինեն. ՀՀ քաղաքացիները ստիպված են լինելու է՛լ ավելի ձգել գոտիները

Վերջին օրերին ձվի շուկայում նկատվող թանկացումը հարուցել է քաղաքացիների անհանգստությունը: ՀՀ ազգային վիճակագրական ծառայության տվյալներով՝ այս տարվա հոկտեմբերին, սեպտեմբերի համեմատ ձուն թանկացել է 3.1 տոկոսով:

Ամանորին ընդառաջ՝ առաջին անգամը չէ, որ ձուն թանկանում է, սակայն այժմ, այն միակ առաջին անհրաժեշտության սննդամթերքը չէ, որը գնաճ է գրանցել: Կտրուկ բարձրացել են նաև կարագի, մսի և կաթնամթերքի գները:

ԿԲ նախկին նախագահ, տնտեսագետ Բագրատ Ասատրյանը նշում է՝ թանկացման միտումը կար դեռևս սեպտեմբեր ամսից, սակայն հոկտեմբերի գնաճը գերազանցեց անցած ինն ամիսների ցուցանիշը. «Սեզոնային գործոնը այս ապրանքատեսակների գործում միշտ եղել է ու կա, հիմնական գործոնը արտաքին գործոնն է, միջազգային շուկայում կարագի գինը բարձրացել է, մեզ մոտ էլ այն դեռ կբարձրանա»:

Քաղաքացիները Factor.am-ի հետ զրույցում դժգոհեցին գնաճից՝ նշելով, որ օրեցօր ավելացող ծախսերն ու դրանց ֆոնին՝ չբարձրացող թոշակներն ու աշխատավարձերը, իրենց հասցնում են հուսահատության: Տնտեսական մրցակցության պաշտպանության պետական հանձնաժողովից թանկացումների հետ կապված մեկնաբանեցին՝ հանձնաժողովը գների կարգավորման կամ վերահսկողության մեխանիզմ չունի, պարզապես այս կամ շուկայում տեղի ունեցող գնային փոփոխությունները կարող են ուսումնասիրվել՝ պարզելու, արդյոք տեղի ունեցած փոփոխությունները համահունչ են միջազգային գնաճին, ձեռքբերման գներին, թե ոչ: Իսկ ձվի և կարագի թանկացման մասով պատասխանը հետևյալն էր՝ «Ձվի դեֆիցիտի վերաբերյալ շրջանառվող տեղեկությունները բացարձակ անհիմն են, նախորդ տարվա նույն ժամանակահատվածի համեմատությամբ գնային փոփոխությունը 2-3 դրամի սահմանում է՝ կախված տեսակից, որակից, արտադրող կամ ներկրող ընկերությունից և այլն: Իսկ կարագի գինն էլ բարձրացել է միջազգային գներով պայմանավորված»:

Անկախ ՏՄՊՊՀ պարզաբանումներից՝ արդեն իսկ ակնհայտ է, որ առաջիկայում ՀՀ քաղաքացիները ստիպված են լինելու է՛լ ավելի ձգել գոտիները: Տնտեսագետ Բագրատ Ասատրյանը նշում է՝ բացի այն, որ առաջիկայում թանակցումներ կլինեն՝ տոներով պայմանավորված, 2018 թվականն էլ դժվար տարի է լինելու:

Լիլիթ Շաբոյան