12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
Գերմանիայի օրենսդիրը համացանցում սպառնալիքի համար խիստ պատիժ նախատեսող օրենք է ընդունել
Քաղաքականություն
19.06.2020 | 17:55
Գերմանիայի Բունդեսթագը հավանության է արժանացրել օրինագիծը, որը համացանցում սպառնալիքի համար պատժի խստացում է նախատեսում։ Փաստաթղթին կողմ են քվեարկել միայն իշխող կոալիցիայի պատգամավորները։ Այս մասին գրում է գերմանական DW-ի ռուսական ծառայությունը։
«Ընդունված օրենքը կծառայի բոլոր այն մարդկանց պաշտպանությանը, որոնց սպառնում և վիրավորում են ռասիստներն ու աջ ծայրահեղականները։ Մենք հստակ ազդակ ենք հաղորդում այն մասին, որ չենք հաշտվի նման դեպքերի հետ և վճռականորեն կհակազդենք»,- հայտարարել է Գերմանիայի արդարադատության նախարար Քրիստինե Լամբրեխտը։
Նա, միաժամանակ, հիշեցրել է Կասելի վարչական շրջանի ղեկավար Վալտեր Լյուբկեի սպանության, Գալլեում հակասեմական ահաբեկչության և Հանաուում ռասիզմի հողի վրա սպանությունների մասին։
Ընդունված օրենքի համաձայն՝ սոցցանցերի օպերատորները պարտավոր են քրեական գործերով դաշնային գերատեսչությանը տեղեկացնել սպանության սպառնալիքի, ազգային ատելության հրահրման, բռնության ակտերի տեսարանների, մանկական պոռնոգրաֆիայի տարածման և քարոզչության, արգելված խորհրդանիշերի օգտագործման, ծանր հանցագործությունների նախապատրաստման և քրեական ու ահաբեկչական խմբավորումներին սատարելու դեպքերի մասին։
Համացանցում հանրային վիրավորանքն այսուհետ կպատժվի ոչ թե մեկ, այլ երկու տարի ժամկետով ազատազրկմամբ։
