12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
ԵՀ-ն դատապարտել է Բելառուսում քաղակտիվիստների ձերբակալությունները
Քաղաքականություն
19.06.2020 | 16:26
Եվրահանձնաժողովի նախագահ Ուրսուլա ֆոն դեր Լայենը դատապարտել է Բելառուսի նախագահական ընտրությունների նախաշեմին քաղաքական ակտիվիստների ձերբակալությունները։ Այս մասին գրում է DW-ի ռուսական ծառայությունը։
Նա երկրի իշխանություններին կոչ է արել անհապաղ ազատ արձակել բոլոր ակտիվիստներին, ինչպես նաև հարգել իրավունքի գերականության սկզբունքն ու ապահովել քաղաքական մրցակցությունը։
Նշենք, որ հունիսի 17-ին Բրեստի դատարանը 15-օրյա ժամկետով կալանավորել է նախագահի թեկնածության հավակնող Սվետլանա Տիխանովսկու նախաձեռնող խմբի մամլո քարտուղար Ալեքսանդր Կաբանովին։ Նախօրեին էլ ձերբակալվել է «Բելգազպրոմբանկ»-ի նախկին ղեկավար, նախագահի թեկնածության հավակնող Վիկտոր Բաբարիկոն, իսկ նրա նախընտրական շտաբի հաշիվն արգելափակվել է։
Միաժամանակ, երեկ երեկոյան Մինսկում նախագահի այլընտրանքային թեկնածուներին աջակցության ակցիաներ են անցկացվել։ «Գարուն» իրավապաշտպան կենտրոնի տվյալներով՝ դրանց շուրջ 2.200 մարդ է մասնակցել։
Բելառուսում նախագահական ընտրությունները նախանշված են օգոստոսի 9-ին։
