26.09.2026 | 17:39
Քննարկվել են Հայաստանի և Կիպրոսի միջև երկկողմ գործընկերության խորացման հարցեր
Թուրքիան խոշոր ռազմական գործողություն է սկսել Իրաքի հյուսիսում․ ՔԱԿ-ի 81 ռազմական օբյեկտ է ոչնչացվել
Քաղաքականություն
15.06.2020 | 15:03
Թուրքիան խոշոր ռազմական գործողություն է սկսել երկրում արգելված Քրդական աշխատավորական կուսակցության (ՔԱԿ) դեմ։ Այս մասին գրում է DW-ի ռուսական ծառայությունը։
Իրաքի հյուսիս-արևելքում Քանդիլ շրջանում թուրքական ավիացիան հարվածներ է հասցրել ՔԱԿ-ի ռազմական օբյեկտների ուղղությամբ՝ 81 թիրախ ոչնչացնելով։ Ավիահարվածներ են հասցվել նաև Սինջար քաղաքում ու մի քանի այլ բնակավայրերում քրդական կուսակցության օբյեկտների ուղղությամբ, հաղորդել է Թուրքիայի Պաշտպանության նախարարությունը։
Ռմբակոծության հետևանքով, ըստ աղբյուրի, ոչնչացվել են ՔԱԿ-ի զինյալների լեռնային ապաստարանները։ Զոհերի կամ վիրավորների մասին տեղեկություններ չկան։
Նշվում է, որ գործողությունն անցկացվել է պաշտպանության նախարար Հուլուսի Աքարի ղեկավարությամբ։
«Թուրքական բանակը լուրջ հարված է հասցրել Իրաքի հյուսիսում ՔԱԿ-ի օբյեկտներին՝ միաժամանակ անելով հնարավորը, որպեսզի հարևան երկրի խաղաղ բնակչության վնասները նվազագույնը լինեն»,- ասված է հայտարարությունում։
Անկարայում հայտարարել են նաև, որ «Արծվի մագիլ» կոչվող գործողության նպատակը Թուրքիայի ժողովրդի և սահմանների պաշտպանությունն է և անցկացվում է ինքնապաշտպանության իրավունքին համապատասխան։
