Հասարակություն
11.06.2020 | 13:34ՊԵԿ նորանշանակ նախագահ Էդվարդ Հովհաննիսյանը Կառավարության նիստից հետո Factor.am-ի հետ ճեպազրույցում անդրադարձավ Վատիկանում ՀՀ նախկին դեսպան, Սերժ Սարգսյանի փեսա Միքայել Մինասյանի քրգործին:
«Տվյալ քրեական գործի հետ կապված նախաքննության գաղտնիության սահմանները հաշվի առնելով՝ թույլատրելիի շրջանակում ՊԵԿ-ը պարբերաբար տեղեկատվություն տարածում է՝ հաշվի առնելով հանրային իրազեկվածության պահանջը և հանրային հետաքրքրվածության բարձր աստիճանը: Մինասյանի կողմից ենթադրյալ թույլ տրված արարքների վերաբերյալ մեր հաղորդագրությունում պատշաճ տեղեկատվություն արդեն տրամադրված է»,- ասաց Էդվարդ Հովհաննիսյանը:
Պատասխանելով հարցին՝ ի՞նչ են անելու հիմա, երբ Մինասյանին կալանավորելու որոշումը դեռ չի բավարարվել, նա նշեց․ «Որոշումը ստանալուց և դրան ծանոթանալուց հետո ընթացք կտրվի: Ինչ վերաբերում է բեկանելուն, Վերաքննիչ դատարանը, ըստ նախնական տեղեկությունների, կալանքի վերաբերյալ միջնորդության քննության հարցը վերադարձրել է առաջին ատյանի դատարան՝ նոր քննության»։
Հովհաննիսյանը հավելեց, որ ավելի կոնկրետ կխոսի որոշումը ստանալուց հետո: Ծխախոտի մաքսանենգության մասին Միքայել Մինասյանի հայտարարությանն անդրադառնալով՝ ՊԵԿ նախագահը տեղեկացրեց, որ բացի նրա պնդումներից՝ որևէ այլ փաստարկ ու հիմնավորումներ առկա չեն:
«Այդ տեղեկություններն ուղղակի հերյուրանք եմ համարում, քանի որ փաստարկ, որևէ հիմնավորում այդ մասին չկա»,- շեշտեց Էդվարդ Հովհաննիսյանը՝ հավելելով, որ ՊԵԿ-ը այլ պետությունների մաքսային մարմիններից չի ստացել որևէ պաշտոնական գրություն՝ արտահանված ծխախոտի մաքսանենգ լինելու վերաբերյալ:
Մանրամասները՝ տեսանյութում։
