11.02.2026 | 13:20
Զելենսկիի գրասենյակն արձագանքել է Ուկրաինայում ընտրությունների և հանրաքվեի հայտարարման մասին լուրերին
Իրավապաշտպանները դատական հայց են ներկայացրել Թրամփի դեմ
Քաղաքականություն
05.06.2020 | 14:43
Քաղաքացիական ազատությունների պաշտպանության ամերիկյան միությունը (ACLU) և այլ կազմակերպություններ դատական հայց են ներկայացրել ԱՄՆ նախագահ Դոնալդ Թրամփի և նրա վարչակազմի դեմ, որում պնդում են, որ Սպիտակ տան հարակից զգոսայգուց հատուկ միջոցների կիրառմամբ ցույցը ցրելիս պաշտոնատար անձինք խախտել են ցուցարարների սահմանադրական իրավունքները։ Այս մասին գրում է DW-ի ռուսական ծառայությունը։
Երկուշաբթի, հիշեցնենք, ոստիկանները Լաֆայետ զբոսայգուց և Սպիտակ տան հարակից հրապարակից ցուցարարներին հեռացնելիս արցունքաբեր գազ և ռետինե փամփուշտներ էին կիրառել։
Ցույցը ցրելուց անմիջապես հետո Դոնալդ Թրամփն անցել է հրապարակով՝ մոտակա եկեղեցու մոտ Ավետարանը ձեռքին լուսանկարվելու համար։ Սպիտակ տան հարակից տարածքը մինչև հիմա փակ է հանրության համար։
Դատական հայցը ներկայացվել է Black Lives Matter D.C. խմբի և անհատ ցուցարարների կողմից, որոնք դեմ են արտահայտվել Մինեապոլիսում աֆրոամերիկացի Ջորջ Ֆլոյդի մահից հետո ոստիկանական բռնություններին և ռասիզմին։ Նման ակցիաներն ԱՄՆ տարբեր քաղաքներում շարունակվում են ավելի քան մեկ շաբաթ։
Թրամփից բացի՝ իրավապաշտպանները մեղադրում են նաև ԱՄՆ գլխավոր դատախազ Ուիլյամ Բարրին և պաշտպանության նախարար Մարկ Էսպերին։ Բարրի պնդմամբ՝ հենց ինքն է հրահանգել ցրել ցույցը՝ Սպիտակ տան շրջակայքում անվտանգության գոտին ընդլայնելու համար։
