30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Նոր հնարավորություն՝ հաշմանդամություն ունեցողների համար․ ֆիզկուլտ ինստիտուտում հատուկ լսարան է բացվել. ՏԵՍԱՆՅՈՒԹ
Հասարակություն
20.02.2020 | 17:45
26-ամյա Սմբատն արդեն կես տարի է՝ Պաշտպանության նախարարության բասկետբոլի թիմում է մարզվում։ Կարճ ժամանակում հասցրել է արտերկրում մի քանի մրցման մասնակցել։ Այսօր արդեն՝ ապագայի ծրագրերին ևս մեկն ավելացավ։ Որոշել է հիմա էլ ֆիզկուլտ ինստիտուտում բարձրագույն կրթություն ստանալ։
«Արդեն հարմարություններ ստեղծվեցին, որպեսզի կարողանանք սայլակով հանգիստ տեղաշարժվել, լսարան մտնել։ Մեծ ցանկություն կա, որ գամ այստեղ մագիստրատուրա ընդունվեմ։ Պոլիտեխնիկն եմ ավարտել, այնտեղ հարմարություն չի եղել, մեծ դժվարությամբ եմ գնացել, աստիճանները բարձրացել-իջել»,- ասում է Սմբատը։
Թեքահարթակից մինչև լսարան․ ֆիզիկական կուլտուրայի և սպորտի ինստիտուտն այսուհետ հասանելի կլինի նաև հաշմանդամություն ունեցողների համար։ Հայաստանյան բուհերից այն դարձավ առաջինը, որտեղ նման պայմաններ ստեղծվեցին։
«Հատուկ կարիքներ ունեցող անձանց համար որակյալ բարձրագույն կրթությունն առավել նշանակալի է, քանի որ նրանց համար կրթությունը ոչ միայն անձնային և մասնագիտական աճի երաշխիք է, այլ նաև երկրի սոցիալական, մարզական, տնտեսական ու քաղաքական գորընթացներում նրանց մասնակցությունն ապահովող կարևորագույն գործոն»,- նշում է Հայաստանի ֆիզիկական կուլտուրայի և սպորտի ինստիտուտի ռեկտորի ժամանակավոր պաշտոնակատար Դավիթ Խիթարյանը։
Նոր լսարանն ամբողջությամբ հարմարեցված է ներառական կրթության համար։ Նստարանները սովորականից լայն են ու բարձր, կախիչները սովարականից ցածր են ամրացված։
«Հաշմանդամություն ունեցող անձինք ոչ միայն ֆիզիկապես պետք է կարողանան մուտք գործել մեր հաստատություններ, այլ նաև ներսում լինեն հավասար։ Սա կարևոր նախաձեռնություն է, որ մյուս բուհերն էլ որպես օրինակ վերցնեն և իրենց տարածքներում, շենքերում ֆիզիկական մատչելիություն ապահովեն»,- ընդգծում է Աշխատանքի և սոցիալական հարցերի նախարարության փոխնախարար Գեմաֆին Գասպարյանը։
Ծանրամարտի աշխարհի նախկին չեմպիոն Նազիկ Ավդալյանը նախաձեռնության հոգեբանական կողմն է կարևորում․ «Շատ կարևոր քայլ էր։ Ցանկանում եմ, որ շարունակական լինի, և մեր երկիրը կարողանա ամեն ինչ անել, որպեսզի նրանք իրենց զգան հասարակության լիարժեք անդամ, իրենց արհեստականորեն չմեկուսացնեն հասարակությունից»։
Ներառական նոր լսարանը Հայաստանում բազկամարտի հիմնադիր, վաստակավոր մարզիչ-մանկավարժ Աշոտ Սարգսյանի անունով է։ Նախաձեռնությանն իրականացվել է Հայաստանի ազգային օլիմպիական կոմիտեի աջակցությամբ։
Մանրամասները՝ տեսանյութում։
Նելլի Մելքոնյան
