04.03.2026 | 10:50
ՔԿ-ն զինվորական հաշմանդամություն ունեցող անձանցից հափշտակություն կատարած հանցավոր խումբ է բացահայտել
«Հայաստանն ու Ֆինլանդիան շատ բան կարող են սովորել միմյանցից». նախագահն ընդունել է ֆինն դեսպանին
Քաղաքականություն
10.12.2019 | 14:51
Հայաստանն ու Ֆինլանդիան շատ ընդհանրություններ ունեն և շատ բան կարող են սովորել միմյանցից: Այս մասին ասել է ՀՀ նախագահ Արմեն Սարգսյանը Հայաստանում Ֆինլանդիայի արտակարգ և լիազոր դեսպան Արյա Մակկոնենիի (նստավայրը՝ Հելսինկի) հետ հանդիպմանը, տեղեկացնում է ՀՀ նախագահի աշխատակազմի մամուլի ծառայությունը:
Խոսելով հայ-ֆիննական հարաբերությունների մասին՝ նախագահը նշել է նաև, որ երկու երկրներն ունեն փոխշահավետ գործակցությունը զարգացնելու մեծ հնարավորություններ:
Զրուցակիցներն անդրադարձել են երկու երկրների նախագահական ինստիտուտների համագործակցության հնարավորություններին: Հաշվի առնելով Ֆինլանդիայի խորհրդարանական կառավարման հարուստ փորձն ու ավանդույթները՝ նախագահ Սարգսյանն առաջարկել է դիտարկել երկու երկրների նախագահական կառույցների միջև փոխգործակցության, մասնավորապես, նախագահների աշխատակազմերի միջև փոխայցելությունների և փորձի փոխանակման ծրագրերի հնարավորությունը: Նախագահն ասել է, որ իր նպատակն է մեր երկրում ունենալ խորհրդարանական կառավարման պայմաններում կայացած ու ամուր նախագահական ինստիտուտ և ստեղծել ավանդույթներ:
Նշելով, որ Ֆինլանդիան մեծ առաջընթաց է գրանցել նորագույն տեխնոլոգիաների ոլորտում՝ նախագահն ասել է, որ այս ոլորտի զարգացումն առաջնահերթություն է նաև Հայաստանի համար: Նախագահ Սարգսյանը պատմել է, որ նախագահական ինստիտուտն ունի տեխնոլոգիաների զարգացմանն ուղղված իր նախաձեռնությունը, որը կոչվում է ATOM և որը նպատակ ունի տեղեկատվական և բարձր տեխնոլոգիաների ոլորտում միջազգային ընկերություններին բերել Հայաստան, որտեղ նրանք կարող են զբաղվել արհեստական բանականության զարգացմամբ, մաթեմատիկական մոդելավորմամբ և այլ ուղղություններով։ Նա նշել է, որ ուրախ կլինեն այս հարթակում, ի թիվս տեխնոլոգիական այլ գործընկերների, տեսնել նաև ֆիննական ընկերություններ:
