Դանիայի վարչապետը բացառել է Գրենլանդիան ԱՄՆ-ին վաճառելու հնարավորությունը

Դանիայի վարչապետ Մետտե Ֆրեդերիկսենը հերքել է ինքնավարության կարգավիճակով թագավորության կազմում ներառված Գրենլանդիան վաճառելու հնարավորությունը: Նա այնպես է մեկնաբանել տեղեկություներն այն մասին, որ ԱՄՆ նախագահ Դոնալդ Թրամփը կղզին գնելու հնարավորության հարց է բարձրացրել, գրում է ՏԱՍՍ-ը:

«Գրենլանդիան չի վաճառվում: Գրենլանդիան դանիական չէ, այն գրենլանդական է: Ես իսկապես հույս ունեմ, որ այս ամենը (կղզու գնման մասին խոսակցությունները) լուրջ չէ»,- ասել է վարչապետը:

Ավելի վաղ այդ մասին հայտարարել էր նաև Դանիայի ԱԳ նախարար Եպպե Կուֆուդը: «Գրենլանդիայի կառավարությունը հստակ հայտարարել է, որ կղզին չի վաճառվում, բայց այն բաց է համագործակցության և առևտրի համար: Դանիական կառավարությունը լիարժեք կիսում է նման մոտեցումը: Գրենլանդիան չի վաճառվում դոլարով, ռուբլով կամ այլ փոխարժեքով»,- ասել է ԱԳ նախարարը:

The Wall Street Journal պարբերականը հինգշաբթի գրել էր, որ Դոնալդ Թրամփը խորհրդականներին հարցրել է՝ արդյո՞ք ԱՄՆ-ն կարող է գնել Գրենլանդիան՝ հետաքրքրություն ցուցաբերելով նման հնարավորության առնչությամբ: Պարբերականի աղբյուրները նշել էին, որ հայտնի չէ՝ Թրամփն այդ մասին լո՞ւրջ է խոսել, թե՞ կատակով: Սակայն կիրակի Fox News-ի եթերում Սպիտակ տան ազգային տնտեսական խորհրդի ղեկավար Լոուրենս Քադլոուն հաստատել էր, որ Թրամփը հետաքրքրված է Գրենլանդիան գնելու հնարավորությամբ:

Հավելենք, որ սեպտեմբերի 2-3-ին ԱՄՆ նախագահը պատրաստվում է Դանիա այցելել: