Ղրղզստանի նախկին նախագահին կոռուպցիայի համար մեղադրանք է առաջադրվել

Ղրղզստանի նախկին նախագահ Ալմազբեկ Աթամբաևին կոռուպցիայի համար մեղադրանք է առաջադրվել: Այս մասին հայտնում է ՏԱՍՍ-ը՝ վկայակոչելով Աթամբաևի փաստաբան Սերգեյ Սլեսարյովին։

«Աթամբաևին կոռուպցիայի համար մեղադրանք է առաջադրվել։ Այլ տվյալներ առայժմ չկան»,- ասել է փաստաբանը։

Նրա խոսքով՝ Աթամբաևին կալանավորել են մինչև օգոստոսի 26-ը՝ մինչև քննչական միջոցառումների իրականացումը։ Փաստաբանի գնահատմամբ՝ նախկին նախագահի ձերբակալության ընթացքում դատավարության ընթացակարգային նորմեր են խախտվել։ Մասնավորապես, Աթամբաևին ձերբակալելու մասին ոչ մի փաստաթուղթ չի ներկայացվել: Նրան միայն ծանուցում է ուղարկվել, որից անմիջապես հետո խափանման միջոց է կիրառվել:

Հիշեցնենք, որ Ղրղզստանի նախկին նախագահ Ալզմեկ Աթամբաևին ուժով ձերբակալելու գործողությունը հատուկ նշանակության ջոկատայիններն օգոստոսի 7-ին էին ձեռնարկել՝ հարձակվելով նրա՝ մայրաքաղաք Բիշքեկից ոչ հեռու՝ Քոյ-Թաշ գյուղում գտնվող առանձնատան վրա։

ՏԱՍՍ-ի տեղեկություններով՝ Աթամբաևի առանձնատան վրա հարձակման արդյունքում վիրավորների թիվն 98-ի է հասել։

Նշենք, որ 2011-2017 թվականներին Ղրղըզստանը ղեկավարած Աթամբաևի դեմ պաշտոնավարման ժամկետի ավարտից հետո մի քանի քրեական գործ է հարուցվել՝ հիմնականում կոռուպցիոն հոդվածներով: Նախկին նախագահը, որն անցել է ընդդիմադիր ճամբար, այս տարվա հունիսին զրկվել է անձեռնմխելիությունից, ինչը նշանակում է, որ նա ցանկացած պահի կարող է քրեական պատասխանատվության ենթարկվել:

Նելլի Մելքոնյան