ԵՐԵՎԱՆԻ ԺԱՄԱՆԱԿՈՎ. «Ինչքա՞ն կարելի է լսել «Անուշ», «Ալմաստ», «Դավիթ Բեկ», մինչև ե՞րբ»․ Վիգեն Ստեփանյան

«А судьи кто? Չէ՞ որ մեզ մոտ ամեն ինչ լինում է «արդար», արվեստագետին դատում են արվեստագետներ, իսկ ամեն արվեստագետ չի կանգնի և ասի՝ նա ինձնից լավն է, նրա ստեղծածն իմ ստեղծածից լավն է։ Այնինչ, տվյալ մրցանակը կարող էր սատարել, լիցքեր հաղորդել թատրոնին՝ իր ապագա գործունեության համար։ Պետք է վերանայվի հանձնաժողովների ձևավորումը, նրանց մոտեցումը պետք է վերանայվի»,- նման կարծիք է հայտնում դերասան, բեմադրիչ Վիգեն Ստեփանյանը՝ Factor.am-ի «Երևանի ժամանակով» զրուցաշարի շրջանակում՝ անդրադառնալով այն հանգամանքին, որ մեր երկրում տարիներ շարունակ չեն բեմադրվում ներկայացումներ, որոնք կարժանանան պետական մրցանակի։

Բեմադրիչը, որն աշխատել է նաև Ալ․ Սպենդիարյանի անվան օպերայի և բալետի ազգային ակադեմիական թատրոնում, անդրադառնում է թատրոնի խնդիրներին և ակնհայտ բացթողումներին։ Նրա խոսքով՝ տարիներ առաջ կոմպոզիտոր Բարսեղ Կանաչյանի դուստրը՝ Սեդա Կանաչյանը, պլանավորում էր կյանքի կոչել իր հոր հեղինակած «Աբեղա» անվանումով օպերայի համերգային կատարումը:

«Գտանք կոմպոզիտոր, որը մշակեց Բարսեղ Կանաչյանի գործը, այն ժամանակ մշակույթի նախարար Հասմիկ Պողոսյանը խոստացավ օժանդակություն ցուցաբերել, բայց դրանից այն կողմ հարցը առաջ չանցավ։ Ահա այսպես բազմաթիվ հայ հեղինակների օպերաներ դրված են դարակներում և չեն բեմադրվում։ Ինչու՞ կրկնենք այն, ինչ բազմիցս արվել է աշխարհում, ինչու՞ չբերենք մերը, հայկականը։ Ինչքա՞ն կարելի է լսել «Անուշ», «Ալմաստ», «Դավիթ Բեկ», մինչև ե՞րբ»,- ասում է բեմադրիչը։

Ինչպես հայտնի է՝ Պատանի հանդիսատեսի թատրոնը գեղարվեստական նոր ղեկավար ունի՝ Դավիթ Հարությունյանը։ Այնինչ, խոսակցություններ էին պտտվում, որ այդ պաշտոնում նշանակվելու է Վիգեն Ստեփանյանը․ «Քաղաքապետարանը գտավ, որ ավելի լավ կլինի, եթե երիտասարդ լինի այդ պաշտոնին, և նա էլ նշանակվեց։ Կոլեկտիվն ուզում էր հայտնել իր կարծիքը, որից հետո էլ քաղաքապետարանը պետք է որոշում կայացներ, սակայն կոլեկտիվը կարծիք չի հայտնել, կամ չեմ ուզում ասել՝ հայտնել է, սակայն անտեսվել է, և Դավիթի՝ տնօրեն լինելը ներկայացրել են արդեն կայացած փաստ»։

Մանրամասները՝ տեսանյութում։

Աննա Բաբաջանյան