Տնտեսություն
09.07.2019 | 12:19ՊԵԿ նախագահ Դավիթ Անանյանն այսօր լրագրողների հետ հանդիպման ժամանակ ամփոփեց հարկային տարվա առաջին կիսամյակը։ Լրագրողի հարցին՝ ՊԵԿ-ն ի՞նչ մասնակցություն ունի ապօրինի գույքի բռնագանձման օրենքի նախագծի մշակման գործում, Դավիթ Անանյանն ասաց, որ զերծ են մնում մասնակցությունից։
«Օրինագծի վրա աշխատում էր ձևավորված աշխատանքային խումբը և այն ղեկավարում էր Արդարադատության նախարարությունը։ Այնուամենայնիվ, մենք այնտեղ ունենք շատ լուրջ դերակատարում և իրավական հարցերով իմ նախկին խորհրդականը՝ պարոն Բադասյանը, շատ ակտիվ զբաղվում էր այդ հարցերով»,- նշեց նա:
Ըստ Անանյանի՝ շատ ուրախ է, որ Բադասյանը, այժմ լինելով նախարար, ի պաշտոնե այդ հարցը կկարողանա տանել առաջ. «Մենք մի փոքր հետ ենք քաշվել այդ պրոցեսից, քանի որ կարծում ենք, որ այն հուսալի ձեռքներում է: Մի շատ կարևոր հարց էլ կա, որ օրինագիծը կարող է առաջացնել տարընթերցումներ ու տարընկալումներ։ Որ ասում են՝ առանց դատական ակտի ապօրինի գույքի բռնագանձում, պետք է միշտ իմանալ, որ հնարավոր չէ որևէ անձի սեփականությունից զրկել առանց դատարանի որոշման։ Ամեն ինչի հիմքում դա է դրված»:
Դավիթ Անանյանը շեշտեց, որ օրինագիծն այնպիսին չէ, որ նախարարությունը կամ ՊԵԿ-ն իրավունք ունենան անձից խլել իր սեփականությունը՝ պետությանը հասցված վնասի դիմաց: «Այդպիսի բան հնարավոր չէ։ Ուղղակի կան գործընթացներ, որոնք կանոնակարգվում են։ Այստեղ իրավական նրբություններ կան։ Սակայն հանրությանը պետք է իրազեկել, որ չի կարելի ընդունել մի ակտ, որն անձին կզրկի սեփականության իրավունքից՝ առանց դատարանի որոշման»,- ասաց ՊԵԿ նախագահը։
Մանրամասները՝ տեսանյութում։
Նարեկ Կիրակոսյան
