08.06.2026 | 11:41
426 մլրդ դրամով բարձր ՀՆԱ. տնտեսական աճը գերազանցել է բյուջեի կանխատեսումները. Հովհաննիսյան․ ՏԵՍԱՆՅՈՒԹ
Երևանում երթ կանցկացվի՝ հաջակցություն Խաչատուրյան քույրերի
Հասարակություն
06.07.2019 | 16:12
Իրավապաշտպան Զարուհի Հովհաննիսյանը ֆեյսբուքյան գրառմամբ տեղեկացրել է, որ այսօր Ազատության հրապարակից երթ է կազմակերպվելու՝ ի պաշտպանություն Խաչատուրյան քույրերի:
«Այսօր, ժամը 18։00-ին, Ազատության հրապարակից կկայանա երթ՝ ի պաշտպանություն Խաչատուրյան քույրերի։
Մենք համարում ենք, որ Երևանում ևս պարտավոր ենք դուրս գալ երթի ի պաշտպանություն Խաչատուրյան քույրերի: Գոնե այն մարդիկ, ովքեր տեղյակ են եղելությունից և կատարվածի անարդար հանգուցալուծումից:
Բոլոր նրանք, ովքեր համամիտ են, որ ընտանիքը կեղեքումների և բռնությունների վայր չէ, այլ վայր է սիրո և հոգատարության, այս շաբաթ օրը, միացեք երթին: Սա անչափ կարևոր է կատարվածը ուղղելու և հետագայում նման ոճիրները կանխելու համար: Մենք պարտավոր ենք աջակցել Խաչատուրյան քույրերին:
Առավել մանրամասն կարող եք տեսնել ֆեյսբուքյան հրավերում՝ այստեղ»,- գրել է նա:
Հիշեցնենք, որ մեծ աղմուկ հանած սպանությունը տեղի է ունեցել անցյալ տարվա հուլիսի 27-ին՝ Մոսկվայում. 17, 18, 19 տարեկան հարազատ քույրերը, այլևս չդիմանալով հոր՝ իրենց նկատմամբ դաժան ու կոպիտ վերաբերմունքին, դանակով բազմաթիվ հարվածներ են հասցրել նրան: Ձերբակալությունից հետո քույրերը խոստովանել են, որ հայրը տարիներ շարունակ տանջել է իրենց: Հարևաններն ու աղջիկների ընկերները պատմել են, որ հայրն իրեն պահում էր իսկական բռնապետի պես, հաճախ էր ցասման նոպաներ ունենում: Հատկանշական է, որ բոլոր հարցվածները քույրերի մասին միայն դրական բաներ են պատմել՝ նրանց բնութագրելով որպես համեստ, բարեհամբույր և հաշտ քույրեր:
