23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Բռնության 1090 հաշվառված դեպք՝ մեկ տարում. ի՞նչ կփոխի Ստամբուլյան կոնվենցիայի վավերացումը. ՏԵՍԱՆՅՈՒԹ
Հասարակություն
03.07.2019 | 17:35
Ընտանեկան բռնության 1.090 հաշվառված դեպք՝ մեկ տարվա ընթացքում: Բռնարարներից 135-ը կին է, 955-ը՝ տղամարդ: Ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ Նելլի Դուրյանի կարծիքով՝ այս թիվը մտահոգիչ է:
«Մտահոգիչ է, որովհետև եթե կա այդքան բռնարար, ուրեմն կա այդքան բռնության ենթարկված անձ։ Փաստորեն, եթե մենք նշում ենք 1090, ուրեմն 1090-ի մեջ կանայք են, տղամարդիկ, ծերեր և, բնականաբար, երեխաներ։ Գրեթե յուրաքանչյուր ընտանիքում մեկից ավելի երեխա կա, և եթե երեխան նույնիսկ ֆիզիկական բռնության չի ենթարկվում, ապա հոգեբանական բռնության է ենթարկվում։ Նա տեսնում է այդ տանը տեղի ունեցող ծեծն ու ջարդը»,- ասաց Նելլի Դուրյանը։
Հայաստանի իշխանություններն ու Եվրոպայի խորհուրդը տվեցին կանանց նկատմամբ բռնության և ընտանեկան բռնության դեմ պայքարի ու դրանց կանխարգելման, ինչպես նաև Ստամբուլյան կոնվենցիայի վավերացմանն ուղղված ծրագրի մեկնարկը:
Նելլի Դուրյանի խոսքով՝ Հայաստանում Ստամբուլյան կոնվենցիայի վավերացումը կարևոր փոփոխություն կբերի՝ հատկապես բռնության ենթարկված անձանց՝ Ոստիկանություն դիմելու գործընթացում։
«Ասում են՝ չէ՞ որ Ոստիկանություն էր դիմել, ինչու՞ ոչինչ չարեցին, և մենք ի պատասխան ասում ենք, բայց չէ՞ որ տվյալ անձն իր բողոքը հետ է վերցրել։ Կոնվենցիայի հոդվածներից մեկով, եթե նույնիսկ անձը ցանկություն ունենա բողոքը հետ վերցնել, ընթացքը գնալու է, քրեական գործ է հարուցվելու, եթե համապատասխան հիմքեր լինեն»,- ընդգծեց Նելլի Դուրյանը։
Աշխատանքի և սոցիալական հարցերի նախարար Զարուհի Բաթոյանի կարծիքով՝ բռնության կանխարգելման հարցում միայն օրենսդրական կարգավորումները բավարար չեն:
«Մեր մեկ տարվա աշխատանքը ցույց է տալիս, որ մենք խնդիր ունենք՝ նախ աջակցության ժամկետների հստակեցման, հաշվառման կարգի հետ կապված, որը նաև օրենսդրական բացի հետևանք է։ Նաև աշխատողների վերապատրաստման խնդիր ունենք։ Այս ծրագրի շրջանակում մենք պետք է վերապատրաստենք սոցաշխատողներին։ Բոլոր ոլորտներում աշխատող մասնագետները կրթության կարիք ունեն։ Շատ կարևոր է հանրային իրազեկման գործառույթը»,- նշեց Զարուհի Բաթոյանը։
Ըստ նրա՝ խնդիրը լուրջ է հատկապես մարզերում բնակվող կանանց պարագայում: Նախարարի համոզմամբ՝ Ստամբուլյան կոնվենցիայի վավերացումը մի շարք կարևոր առավելություններ կտա։
«Կոնվենցիայի վավերացումը նախ շատ լուրջ հնարավորություն է տալիս՝ օրենսդրությունը վերանայելու, ժամանակին աջակցություն տրամադրելու։ Այն նաև հնարավորություն է տալիս, որ Հայաստանը դառնա մոնիթորինգի խմբի անդամ, որից կարող է աջակցություն հայցել, թե ծրագրերի քաղաքականության վերանայման գործընթացը որքանով է արդյունավետ եղել, ինչպիսի խնդիրներ կան, և այս իմաստով միջազգային աջակցությունը շատ ավելի մեծ կլինի»,- ընդգծեց նախարարը։
Հայաստանում Եվրախորհրդի գրասենյակի ղեկավար Նատալյա Վուտովայի խոսքով՝ բռնության կանխարգելման հարցում Հայաստանը ճիշտ ուղու վրա է կանգնել 2017 թվականից, երբ մեկնարկեցին Ընտանեկան բռնության մասին օրենքի քննարկումները։
«Ընտանեկան բռնությունից տուժողներն աղջիկներ են, կանայք, երեխաներ, որոնք վաղն իրենց ընտանիքն են ստեղծելու: Դժբախտաբար, այս չարաբաստիկ երևույթն ամբողջ աշխարհում է տարածված։ Այդ պատճառով Եվրոպայի խորհուրդը յուրահատուկ գործիք է ստեղծել՝ դրա դեմ պայքարելու համար»,- ասաց Նատալյա Վուտովան։
Հայաստանում բռնության կանխարգելման և Ստամբուլյան կոնվենցիայի վավերացմանն ուղղված ծրագիրը կիրականացվի Եվրոպայի խորհրդի՝ Հայաստանի համար իրականացվող գործողությունների ծրագրի շրջանակում, դոնոր երկրների՝ Գերմանիայի, Իռլանդիայի, Լիխտենշտայնի և Նորվեգիայի ֆինանսավորմամբ: Ծրագրի շրջանակում կվերապատրաստվեն իրավագետներ, Ոստիկանության աշխատակիցներ, սոցիալական աշխատողներ, ինչպես նաև աջակցություն կցուցաբերվի Հայաստանում բռնության զոհ դարձած կանանց:
Նելլի Մելքոնյան
