Թուրքիայի և Վրաստանի քաղաքացիները 2025 թվականին ԵՄ-ից արտաքսումների թվով առաջին ու երկրորդ տեղերում են

Վրաստանի քաղաքացիները 2025 թվականին Եվրամիության երկրներից արտաքսումների թվով երկրորդ տեղն են զբաղեցնում՝ Թուրքիայի քաղաքացիներից հետո։ Այս մասին է վկայում ԵՄ զեկույցը։ Ըստ վիճակագրության՝ ԵՄ-ից արտաքսվել է Թուրքիայի 13,405 քաղաքացի և Վրաստանի 10,475 քաղաքացի, գրում է OC Media-ն։

Երրորդ տեղում սիրիացիներն են՝ 8370, որին հաջորդում են ալբանացիները՝ 8020 և ռուսաստացիները՝ 5727։

Վիճակագրության համաձայն՝ 2025 թվականին Վրաստանի 16,230 քաղաքացիներ անօրինական կերպով գտնվել են ԵՄ-ում։

Եվրահանձնաժողովի վիճակագրության բաժնի՝ Եվրոստատի կողմից հրապարակված թվերը ցույց են տալիս, որ ԵՄ անդամ չհանդիսացող 491,950 քաղաքացիների հրաման է տրվել լքել ԵՄ տարածքը, ինչը 2024 թվականի համեմատությամբ 5,8%-ով ավելի է: Նրանցից 135,460-ը լքել են ԵՄ-ն:

Գերմանիան արտաքսել է ամենամեծ թվով վրացիներին՝ 2025 թվականին վերադարձնելով 2805 մարդու։

Լեհաստանը երկրորդ տեղն է զբաղեցրել արտաքսումների քանակով՝ վերադարձրել է 1965 մարդու։

Տվյալները ցույց են տալիս, որ վրացիների թիվը, որոնց հրաման է տրվել լքել ԵՄ-ն, անշեղորեն աճել է՝ 2024 թվականին մյուս բոլոր ազգությունների շրջանում հասնելով 12, 050-ի:

Ըստ վիճակագրության՝ վրացիները 2025 թվականին ԵՄ մուտքն արգելված ազգությունների մեջ յոթերորդն են՝ ընդհանուր 4785 անձ։ Համեմատության համար՝ 2024 թվականին 4825 մարդու մուտքն է արգելվել, 2023 թվականին՝ 4320, իսկ 2022 թվականին՝ 5640։

ԵՄ վիճակագրությունը հստակորեն չի նշում արտաքսումների պատճառները: Լեհաստանը, որը ԵՄ-ում հայտնի երկիր է վրացի աշխատողների համար, 2025 թվականի նոյեմբերին ընդունել է կանոնակարգ՝ չեղյալ համարելով վրացիների աշխատանքի պարզեցված ընթացակարգերը: 2024 թվականին վրացիները կազմում էին Լեհաստանի կողմից արտաքսված բոլոր օտարերկրյա քաղաքացիների մեկ երրորդը՝ 2500 մարդ։ Լեհական ոստիկանության համաձայն՝ Վրաստանի քաղաքացիները մեկ շնչի հաշվով ամենամեծ թվով հանցագործություններն են կատարել բոլոր օտարերկրյա քաղաքացիների շրջանում, իսկ վրացիների շրջանում հանցագործության մակարդակը կրկնապատկվել է 2020 թվականից ի վեր։

Թարգմանությունը՝ Էմմա Չոբանյանի